Манай улсын иргэд гадаадын үндэстэн дамнасан бүлэглэлд татагдан оролцож цахим залилан үйлдэж байсныг цагдаагийн байгууллага илрүүллээ. Эдгээр этгээдүүд нь Телеграм платформоор дамжуулан зохиомол байдлыг үүсгэж иргэдийн итгэл үнэмшлийг олж авах замаар залилан үйлддэг болох нь тогтоогдоод байгаа юм.
Телеграм платформоор дамжуулан цахим хуудасны холбоос үүсгэж тодорхой шатлалт даалгавар биелүүлэх, хуурамч хэтэвч үүсгэн мөнгөн урамшуулал олгох зэргээр иргэдийн итгэл үнэмшлийг олж авч залилах гэмт хэргийг гадаад улсаас үйлдэж байгааг тогтоосон байна. Мөрдөн шалгах ажиллагааны явцад гадаад улсын бүлэглэлд элсэн орж Монгол Улс руу чиглэж залилах гэмт хэргийг бүлэглэн үйлдэж байсан нэг иргэнийг илрүүлж цагдан хорих таслан сэргийлэх арга хэмжээ аваад байна. Мөн энэ төрлийн гэмт хэргийг гадаад улс руу чиглэж үйлддэг таван иргэнийг баривчилсан байна. Цаашид энэ төрлийн гэмт хэргийг таслан зогслох чиглэлээр гадаад улсын бүлэглэлтэй хамтран залилах гэмт хэрэг үйлддэг Монгол Улсын 12 иргэнийг интерполын шугамаар эрэн сурвалжилж байна. Манай улсад өнгөрсөн оны долоодугаар сараас эхлэн Телеграм платформоор дамжуулан залилах гэмт хэрэгт өртсөн хохирогчид цагдаагийн байгууллагад хандах болсон. Өнөөдрийн байдлаар, зөвхөн теллеграм платформтой холбоотой 60 гаруй тэрбум төгрөгийн хохиролтой 1200 гаруй хэрэг цагдаагийн байгууллагад бүртгэгдээд байна. Энэ төрлийн гэмт хэрэгт манай улсын иргэд мөнгөн авч дансаа ашиглуулах тохиолдол ч цөөнгүй байгааг албаныхан хэлж байна. Ингэснээр тухайн гэмт хэргийн холбогдогч болох эрсдэлтэйг сануулж байна.
