ЗЭВСЭГТ ХҮЧНИЙ БҮХ ЦЭРГИЙН АНГИУДАД ЭРСДЭЛИЙН ҮНЭЛГЭЭНИЙ ИЖ БҮРЭН ШАЛГАЛТ ХИЙНЭ

Батлан хамгаалахын сайдын зөвлөлийн ээлжит хуралдаан болж цэргийн алба хаагчдын аюулгүй байдлыг нэн тэргүүнд тавьж, эрсдэлийг бууруулах чиглэлээр дараах шийдвэрүүдийг гаргажээ.

Тодруулбал, 2026 он дуустал эрсдэл үүсэж болзошгүй, өндөр дайчилгаа шаардсан бүх төрлийн сургуулилтыг хойшлуулах шийдвэр гаргав. Мөн намрын ургац хураалт болон бусад ажилд хууль, эрх зүйн хүрээнд цэргийн алба хаагчдыг оролцуулах тохиолдолд тэднийг эрсдэл өндөртэй техник, тоног төхөөрөмж дээр ажиллуулахгүй байх нөхцөлийг гэрээнд тодорхой тусгаж, аюулгүй ажиллагааг хатуу мөрдүүлэхийг үүрэг болгов.

Монгол Улсын Зэвсэгт хүчинд хэрэгжүүлж буй “Цэргийн албыг эрсдэлээс чөлөөлье” реформын хэрэгжилтийг эрчимжүүлж, Зэвсэгт хүчний бүх анги, байгууллагад эрсдэлийн үнэлгээ, аюулгүй ажиллагааны иж бүрэн хяналт шалгалтыг эхлүүлэх үүрэг чиглэл өгчээ.

Түүнчлэн Цэргийн албаны тухай хуульд өөрчлөлт оруулах замаар цэргийн дүйцүүлэх албаны тогтолцоог боловсронгуй болгох ажлыг эрчимжүүлэхээр болов. Ингэхдээ хөдөө орон нутаг, алслагдсан бүс нутагт эрэлт хэрэгцээтэй байгаа багш, эмч зэрэг мэргэжлээр тодорхой хугацаанд ажилласан иргэнийг цэргийн албыг дүйцүүлэн хаасанд тооцох боломжийг бүрдүүлэх чиглэлээр холбогдох журмын өөрчлөлтийг боловсруулан ажиллаж байна.

Мөн ерөнхий боловсролын сургуулийн сурагчдад эх оронч үзэл, хүмүүжил, цэргийн анхан шатны мэдлэг олгох зорилгоор “Цэрэг, эх оронч хүмүүжил – Цэрэгжилтийн хичээл”-ийг энэ намраас туршилтын журмаар зохион байгуулах бэлтгэлийг хангах үүрэг өглөө.

Цэргийн алба хаагчдын нийгмийн хамгааллыг сайжруулах ажлын хүрээнд тэдний гэр бүлийн гишүүдийг тогтвортой орлого олох боломжтой болгох, өрхийн үйлдвэрлэл эрхлэхэд нь дэмжлэг үзүүлэх төслийн тоног төхөөрөмжийн худалдан авалтыг эрчимжүүлэхийг холбогдох албан тушаалтнуудад үүрэг болгов.

Батлан хамгаалах салбар цэргийн алба хаагчдын амь нас, эрүүл мэнд, аюулгүй байдлыг хамгаалах, албаны орчин дахь эрсдэлийг системтэйгээр бууруулахын зэрэгцээ тэдний болон гэр бүлийнх нь нийгмийн баталгааг сайжруулах бодлогыг үе шаттай хэрэгжүүлж байна.

Мөн сайдын зөвлөлийн хуралдаанаар Батлан хамгаалахын сайдаас өмнө өгсөн үүрэг, даалгаврын хэрэгжилтийн явцыг хэлэлцэж, биелэлт 67.7 хувьтай байгааг танилцуулав. Үүнтэй холбогдуулан хэрэгжилт хангалтгүй байгаа зарим ажилд тавих хяналтыг сайжруулж, гүйцэтгэлийг эрчимжүүлэхийг холбогдох албан тушаалтнуудад үүрэг болголоо.