, УБ
, УБ
Монголын Хүүхдийн Анагаахын Академи, Анагаахын Шинжлэх Ухааны Үндэсний Их Сургууль (АШУҮИС)-ийн Анагаах Ухааны Сургуулийн Хүүхдийн анагаахын тэнхим хамтран АНУ-ын Baylor College of Medicine, Texas Children’s Hospital, Boston Children’s Hospital, Япон Улсын Saitama Children’s Medical Center байгууллагын профессор, эмч, мэргэжилтнүүдийг эх орондоо хүлээн авч, PALS – Pediatric Advanced Life Support олон улсын хамтарсан сургалтыг 2026 оны 9 дүгээр сарын 28-наас 10 дугаар сарын 1-ний өдрүүдэд АШУҮИС-ийн Анагаах Ухааны Сургуулийн Эмнэлзүйн Ур Чадварын Төвд зохион байгууллаа.
АНУ-аас хүрэлцэн ирсэн багш, мэргэжилтнүүдийн багийг Харвардын Их Сургуулийн профессор, хүүхдийн мэдээгүйжүүлэг, эрчимт эмчилгээний эмч Кейра Мэйсон ахалсан ба багийн бүрэлдэхүүнд хүүхдийн мэдээгүйжүүлэг, эрчимт эмчилгээ, хүүхдийн зүрхний эрчимт эмчилгээ, хүүхдийн ерөнхий анагаах ухаан, хоол боловсруулах эрхтэн судлалын чиглэлээр ажилладаг профессор, эмч, мэргэжилтнүүд оролцов.
Сургалтын хүрээнд хүүхдийн амь насанд аюултай байдал, зүрх, амьсгалын дутагдлыг эрт таних, сэхээн амьдруулах тусламжийг цаг алдалгүй үзүүлэх, яаралтай тусламжийн үед багаар ажиллах, эмнэлзүйн шийдвэр гаргах зэрэг PALS сургалтын үндсэн мэдлэг, ур чадварыг эмнэлзүйн дуураймал орчинд дадлагажуулах чиглэлээр онол, дадлага хосолсон сургалт зохион байгуулагдлаа.
Мөн АНУ-ын Baylor College of Medicine, Texas Children’s Hospital-ийн дэд профессор Лиза Каплан, түүний баг хамт олон “Simulation-Based Education” буюу "Эмнэлзүйн дуураймал орчинд суурилсан сургалтын арга зүй" сэдвээр онол, дадлага хосолсон сургалт явуулан, 8 аймгийн нийт 28 эмчийг хамруулав.
Тус сургалтанд оролцогчид эмнэлзүйн бодит нөхцөлд ойр дуураймал орчинд ажиллах, тохиолдолд суурилсан сургалтын сценарийг боловсруулах, багийн ажиллагааг сайжруулах, сургалтын дараах хэлэлцүүлэг, дүгнэлтийг үр дүнтэй зохион байгуулах арга зүйн мэдлэг, ур чадвараа дээшлүүлсэн.
2026 оны 10 дугаар сарын 1-ний өдөр Анагаах Ухааны Сургуулийн багш нарт зориулсан “Эмнэлзүйн ур чадварт суурилсан сургалт” зохион байгуулагдаж, олон улсын профессор, эмч, мэргэжилтнүүд эмнэлзүйн сургалтын орчин үеийн арга зүй, симуляцид суурилсан сургалт, ур чадварын үнэлгээг хэрхэн хийх, багшлах арга барилын талаарх туршлагаа хуваалцлаа.
Энэхүү олон улсын хамтарсан сургалт нь хүүхдийн яаралтай, эрчимт эмчилгээний тусламжийн чанарыг сайжруулах, эмч, багш нарын мэргэжлийн ур чадварыг дээшлүүлэх, PALS ба симуляцид суурилсан сургалтын арга зүйг Монгол Улсад хөгжүүлэх, түгээн дэлгэрүүлэхэд өндөр ач холбогдолтой арга хэмжээ болсон хэмээн дүгнэжээ.
Ивээн тэтгэлэгт мэдээ
