АҮЭБЯ-ны ээлжит шуурхай хуралдаанаар салбарын эрх зүйн шинэчлэл, стратегийн төслүүдийн хэрэгжилтийг эрчимжүүлэх үүрэг өглөө

Аж үйлдвэр, эрдэс баялгийн яамны ээлжит шуурхай хуралдаан болж, хуралдааныг Төрийн нарийн бичгийн дарга Б.Дашпүрэв удирдан явууллаа.

Хуралдааны эхэнд 2026 оны 10 дугаар сарын 16-ны өдөр Улсын Их Хурлаар эцэслэн баталсан Ашигт малтмалын тухай хуульд нэмэлт, өөрчлөлт оруулах тухай хуулийн хэрэгжилтийг хангах бэлтгэл ажлыг эрчимжүүлэх асуудлыг хэлэлцэв.

Төрийн нарийн бичгийн дарга Б.Дашпүрэв хуулийн нэмэлт, өөрчлөлттэй уялдуулан холбогдох дүрэм, журмыг шинэчлэх, шинээр боловсруулах, шаардлагатай зохицуулалтыг батлуулах ажлыг шуурхай зохион байгуулж, хуулийн хэрэгжилтийг хангахыг холбогдох газар, хэлтсийн удирдлагуудад үүрэг болголоо.

Мөн яамны архивын байр, баримт бичгийн хадгалалт, хамгаалалттай холбоотой асуудлыг шийдвэрлэх хүрээнд холбогдох байгууллагад албан шаардлага хүргүүлж, асуудлыг тодорхой шийдэлд хүргэх чиглэлээр ажиллахыг даалгав.

Хуралдааны төгсгөлд Төрийн нарийн бичгийн дарга Б.Дашпүрэв салбарын эрх зүйн шинэчлэлийн хэрэгжилтийг хангах, стратегийн төслүүдийн ажлыг эрчимжүүлэх, холбогдох байгууллагуудын уялдаа холбоог сайжруулах, өгсөн үүрэг даалгаврын биелэлтэд тогтмол хяналт тавьж ажиллахыг газар, хэлтсийн удирдлагуудад даалгалаа.