, УБ
, УБ
Непал, Төвдийн хил орчимд мөсөн голын хэсэг, хад чулуу их хэмжээгээр нурж, голын хөндий рүү унаснаас үүдэн асар их хүчтэй гэнэтийн шавар, чулуулгийн үер буужээ. Хиймэл дагуулаас авсан зургаас үзвэл 5200 метрийн өндөрт байсан мөсөн голын доод хэсэг тасарч, 1200 орчим метр доорх хөндий рүү унасан шинж тэмдэг илэрсэн байна.
Цагдаагийн байгууллагаас одоогийн байдлаар үерийн улмаас 162 хүн нас барсан, 579 жуулчин сураггүй байгаа ба тэдний 400 гаруй нь гадаадын иргэд гэж мэдээллээд байна. Аврах ажиллагаа үргэлжилж байгаа тул хохирогчдын тоо цаашид ч нэмэгдэх хандлагатай байгаа юм.
Хамгийн их хохирол Расува, Навакот, Дхадинг суурин орчимд бүртгэгдэж, голын эргийн суурингууд, авто зам, гүүр, усан цахилгаан станцууд сүйдсэн байна.
Гамшигт өртөгсдийг Непалын арми болон цагдаагийнхан нисдэг тэргээр эрэн хайх ажиллагаа явуулж, хамгийн их хохирол амссан бүсүүдэд майхан, хүнс, анхан шатны тусламж хүргэж байна. Мөн Энэтхэгээс тусламж илгээсэн бөгөөд НҮБ болон бусад улсын байгууллагууд ч аврах ажиллагаанд оролцож эхэлжээ.
Нөхцөл байдал одоо ч намжаагүй бөгөөд Тришули голын дагуух суурингуудын хувьд үерийн дараагийн давалгаа болон голын түр бөглөрөл задарч дахин их ус буух эрсдэл хамгийн том анхаарах зүйл болж байгаа тухай мэдээллэж байна.
Эх сурвалж: Reuters
