2025-2026 оны хичээлийн жилд улсын хэмжээнд 278 мянга гаруй хүүхэд сургуулийн өмнөх боловсролд хамрагдах тооцоо гарчээ. Одоогийн байдлаар 74 мянга гаруй эцэг эх, асран хамгаалагч хүүхдийнхээ цэцэрлэгийн бүртгэлийг баталгаажуулсан байна. Харин багшлах боловсон хүчний хувьд энэ жил 400 гаруй цэцэрлэгийн бүлгийн багш шаардлагатай гэж гарчээ. Улсын хэмжээнд 11 мянга гаруй цэцэрлэгийн багш 2-5 хүртэлх насны хүүхдэд боловсролын үйлчилгээ үзүүлж байна. Сүүлийн жилүүдэд хүний нөөцийн дутмаг байдлаас шалтгаалж нэг багшид ногдох хүүхдийн тоо өндөр, өдөрт 10-12 цаг ачаалалтай ажилладаг. Нийслэл хотын хэмжээнд нэг ангид 30-40 гаруй хүүхэд нэг дор суралцах тохиолдол цөөнгүй байдаг. Улмаар хүүхдийн онцлогт тохирсон хөгжлийг дэмжих, ганцаарчилж анхаарал хандуулах боломж хомс байдгийг багш нар мөн хэлж байсан юм. Энэ хичээлийн жилд багшийн сул орон тоог нөхөхийн тулд дээд боловсролтой иргэдийг багшлах эрхийн богино хугацааны сургалтад хамруулах, өндөр насны тэтгэвэр тогтоолгосон багш нарыг хүсэлтийнх нь дагуу ажиллуулах зэргээр арга хэмжээ авч байна гэсэн юм. Нөгөөтэйгүүр энэ хичээлийн жилээс эхлэн сургуулийн өмнөх боловсрол шинэчлэн боловсруулсан сургалтын хөтөлбөрийн дагуу хичээллэхээр бэлтгэл ханган ажиллаж байна.