Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, НҮБ-ын Мансууруулах бодис, гэмт хэрэгтэй тэмцэх алба, Монгол Улс дахь НҮБ-ын Суурин зохицуулагчийн газартай хамтран “Бүс нутагт болон Монгол Улсад үйлдэгдэж буй зохион байгуулалттай гэмт хэргийн нөхцөл байдал” сэдэвт хэлэлцүүлгийг зохион байгууллаа.

Зүүн өмнөд Ази, Номхон далайн бүс нутагт үйлдэгдэж буй үндэстэн дамнасан зохион байгуулалттай гэмт хэргээс урьдчилан сэргийлэх, таслан зогсоох, Монгол Улс дахь гэмт хэргийн нөхцөл байдал, тулгамдаж буй асуудлыг хэлэлцэх, шийдвэрлэх арга замыг тодорхойлох, чиглэлийн байгууллагуудын хамтын ажиллагааг бэхжүүлэхэд тус хэлэлцүүлгийн зорилго оршиж байна.

Хэлэлцүүлгийг нээж Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл хэлсэн үгэндээ сүүлийн жилүүдэд үндэстэн дамнасан зохион байгуулалттай гэмт хэрэг технологийн дэвшилтэй зэрэгцэн өсөх хандлагатай байгааг онцлоод энэ төрлийн гэмт хэргээс урьдчилан сэргийлэх, илрүүлэх, таслан зогсооход Ази , Номхон далайн бүс нутгийн бусад улс орнуудын сайн туршлагыг нэвтрүүлэх шаардлагатай гэдгийг онцоллоо.

НҮБ-ын Мансууруулах бодис, гэмт хэрэгтэй тэмцэх албаны Зүүн өмнөд Ази, Номхон далайн бүс нутгийн дэд дарга ноён Бенедикт Хофман бүс нутгийн хэмжээнд үйлдэгдэж буй гэмт хэрэг тэр дундаа хүн худалдаалах, цагаачдыг хууль бусаар хил нэвтрүүлэх, байгаль орчин, цахим гэмт хэргийн нөхцөл байдлын талаар танилцуулж, дээрх гэмт хэрэгтэй тэмцэх ажилд дэмжлэг үзүүлж, хамтран ажиллахаа илэрхийлсэн.

Танилцуулга илтгэлийг НҮБ-ын МБГХТА-ны ЗӨАНДБ-ийн Мансууруулах бодисын хяналт, гэмт хэргээс урьдчилан сэргийлэх мэргэжилтэн Иншик Сим “Бүс нутагт үйлдэгдэж буй үндэстэн дамнасан зохион байгуулалттай гэмт хэрэг ба өнөөгийн чиг хандлага” сэдвийн хүрээнд хийсэн бол ЦЕГ-ын Гадаад харилцаа, энхийг сахиулах ажиллагааны хэлтсийн дарга Б.Эрдэнэдалай “Монгол Улс дахь гэмт хэргийн нөхцөл байдал, статистик тоо баримт, хууль сахиулах байгууллагад тулгамдаж буй асуудал” сэдвээр мэдээлэл өглөө.

Мөн АТГ-ын Гүйцэтгэх ажлын хэлтсийн дарга Х.Баярмагнай Монгол Улс дахь авлигын чиг хандлага, өндөр эрсдэлтэй салбар ба авлигатай тэмцэхэд авч хэрэгжүүлж буй санаачилгыг танилцуулж, НҮБ-ын МБГХТА-ны Монгол дахь Суурин төлөөлөгч Лонг Нгуен хууль сахиулах байгууллагын сургалт, авлигын эсрэг Монгол Улсад хэрэгжүүлж буй ажил арга хэмжээний явцын талаар мэдээлэл өгч, санал солилцлоо.

“Бүс нутагт болон Монгол Улсад үйлдэгдэж буй зохион байгуулалттай гэмт хэргийн нөхцөл байдал” хэлэлцүүлэгт үндэстэн дамнасан зохион байгуулалттай гэмт хэрэгтэй тэмцэх, урьдчилан сэргийлэх чиг үүрэг бүхий олон улсын болон хууль сахиулах байгууллага, дипломат төлөөлөгчийн газрын 60 гаруй төлөөлөл оролцлоо.