Боловсролын сайд Л.Энх-Амгалан БНСУ-аас Монгол улсад суугаа Элчин сайд Чой Жин Вонтой уулзжээ. Монгол Улс БНСУ-тай:

• Сургуулийн хоолны үйлдвэрлэл, үйлчилгээний орчныг сайжруулах
• Мэдээлэл технологийн ухаалаг танхим байгуулах
• Багш нарыг чадавхжуулах төсөл
• Багш солилцооны хөтөлбөр
• Дээд боловсролын салбарт ШУТИС, ХААИС-д хүний нөөцийг чадавхжуулах, чадавх бэхжүүлэх төслүүд амжилттай үр дүнтэй хэрэгжүүлж байна.

Уулзалтаар дараах чиглэлүүдэд хамтран ажиллах талаар санал солилцлоо.

• Эрүүл мэндийн салбарт 1000 эмч, сувилагч, судлаач бэлтгэх

Монгол Улсад бэлтгэгддэггүй, нэн дутагдалтай эмч, сувилагч, эмнэлгийн мэргэжилтнийг бэлтгэх, анагаахын шинжлэх ухаанд шинэ мэдлэг, технологи, инновацыг бий болгож нутагшуулах, хүн амын эрүүл мэндийг хамгаалах чадварлаг мэргэжилтэн, хүний нөөцийг бэлтгэхэд чухал ач холбогдолтой.

• “Нэг сурагч-Нэг компьютер, Нэг анги-Нэг ухаалаг самбар” арга хэмжээ

Дэжон хотын Боловсролын газартай хамтран хэрэгжүүлж буй “Дэвшилтэт мэдээлэл, харилцаа холбооны технологи ашиглан туршилтын анги байгуулах” төслөөр мэдээллийн технологийн анги танхимууд, сургалтад хамрагдан мэргэжил дээшлүүлж байгаа багш нар дээрх зорилт, арга хэмжээнүүдийг хэрэгжүүлж байна. Тиймээс “Нэг сурагч-Нэг компьютер, Нэг анги-Нэг ухаалаг самбар” арга хэмжээний хүрээнд хамтран ажиллах боломжтой.

• Монгол Улсын ерөнхий боловсролын сургуулийн хоол үйлдвэрлэл үйлчилгээний орчныг сайжруулах, чадавхыг бэхжүүлэх” төслийг үргэлжлүүлэх

КОЙКА-гийн 8 сая ам.долларын буцалтгүй тусламжийн хүрээнд 2022 оноос хойш сургуулийн хоол үйлдвэрлэлийн чиглэлээр хамтран ажиллаж байна. Энэхүү төсөл нь ШУТИС-ийн Хүүхдийн хоол шим тэжээл, сургалт арга зүйн үндэсний төв болон ерөнхий боловсролын 10 сургуулийн хоол үйлдвэрлэл, үйлчилгээний орчныг засварлан сайжруулж, тоног төхөөрөмж суурилуулан жишиг түвшинд хүргэж байна. Цаашид сургуулийн хоол үйлдвэрлэл, үйлчилгээнд баримтлах тогтолцоо, стандартын шаардлагад нийцсэн бодит загвар бий болгож байгаа энэхүү үр дүнтэй төслийг үргэлжлүүлж, хоёрдугаар үе шатыг хэрэгжүүлэхэд хамтран ажиллах талаар санал солилцлоо.