, УБ
, УБ
Шатахууны нөөцтэй холбоотой асуудлаар Ашигт малтмал, эрдэс баялгийн сайд Г.Дамдинням мэдээлэл өглөө.
Тэрбээр "Иргэдийн дунд хүлээлт үүсгээд байгаа учраас хамгийн түрүүнд тайван амгалан байцгаа, шатахууны нөөц бий гэдгийг хэлье. Манай импортолдог улс орны нөхцөл байдал хүнд байгаа ч Засгийн газраас идэвх санаачилга гарган өнгөрсөн дөрөвдүгээр сард батлуулсан Засгийн газар хоорондын хэлэлцээрийн үр дүнд ОХУ-аас шатахууныг төрөл бүрээр нь авч, өнөөдрийг хүртэл оруулж ирж байна. Өнгөрсөн оны аравдугаар сард болсон хямралын үед шатахууны долоо хоногийн нөөцтэй байсан. Өнөөдөр бидэнд 33 хоногийн нөөц байна. Араас нь орж ирж байгаа.
2026 оны долоодугаар сард ОХУ-аас 47 мянган тонн АИ-92 автобензин, 1,200 тонн АИ-95 автобензин, 88,860 тонн дизель түлш худалдан авахаар захиалгаа гэрээ хийсэн байгаа. Мөн БНХАУ-аас 71 мянган тонн бүтээгдэхүүн худалдан авахаар захиалга өгөөд байна. Энэ сард нийт 200 гаруй мянган тонн бүтээгдэхүүн гаднаас авч хэрэглэнэ гэсэн төлөвлөгөөтэй байгаа.
Өнгөрсөн хоёр хоногт баяр наадамтай холбоотойгоор шатахууны хэрэглээ хоёр дахин өссөн. Иргэдийн дунд бага зэрэг айдас байх шиг байна. Айдас дээр нь улс төр хийх гэсэн оролдлогууд ч байх шиг байна. Битгий айж тэвдээрэй, бодит тоонд итгэ гэж хэлье.
Өнгөрсөн шөнө Улаанбаатар хотын бүх шатахуун түгээгүүрийг цэнэглэсэн. Одоо бол ердийн үеийнхээс 3-4 дахин их авч байна. Нэн цэнэглээд гурав хонодог байсан шатахуун түгээгүүрийн шатахуун өдөртөө дуусаад байгаа.
Өнөөдөр Монгол Улсын хэмжээнд 54 вагон шатахуун бууж байна. Нэг нь 60 тонн байдаг юм. Тэгэхээр өдрийн хэрэглээнээс илүү буюу 3000 гаруй тонн гэсэн үг. Өнөөдөр 71 вагон шатахуун ачигдаж байгаа. Гурав хоногийн дараа орж ирнэ.
Мөн БНХАУ-аас шатахуун авч байгаа. Сард 3000 тонныг авдаг байсан бол 7000 тонн болгож авсан. Нэмээд БНХАУ руу 14000 тоннын захиалга өгсөн. Өнөөдөр ачигдаж байгаа. Энэ шатахуун ирэх лхагва гаригт орж ирнэ.
Газрын тосны бүтээгдэхүүнийг гуравдагч орнуудаас авна гэж байгаа ч дэлхий даяар шатахууны хямралтай байна.
Цаашид бид Газрын тосны үйлдвэртэй болно. Ажил эрчимтэй явж байгаа. 3,500 хүн 24 цагаар ажиллаж байна. Нэмж 1,500 хүн орж ирнэ. 2028 онд багтааж дуусгана" гэв.
