Цөлжилттэй тэмцэх Нэгдсэн Үндэстний Байгууллага(НҮБ)-ын конвенцын талуудын 17 дугаар бага хурлын талаарх мэдээллийг олон нийтэд нээлттэй танилцуулах Ногоон бүсийн үйл ажиллагаа өнөөдрөөс эхэллээ.

Ногоон бүс нь олон нийтэд нээлттэй, оролцоонд суурилсан талбар бөгөөд иргэд, хувийн хэвшил, иргэний нийгэм, залуучууд, эрдэм шинжилгээний зэрэг 60 гаруй байгууллага нэг дор холбож, байгаль орчны шийдэл, инновац, сайн туршлага, хамтын ажиллагааг олон нийтэд танилцуулах юм. Тус бүсийг одоогоор 2 мянга орчим иргэн үзэж сонирхсон гэх албан бус тоо гарсан байна.

Иргэд Ногоон бүсэд хүрэлцэн ирэхдээ Үндэсний цэцэрлэг хүрээлэнгийн зүүн хойд хаалгаар нэвтэрч иргэдийг хүлээн авах цэгээс зориулалтын гольф карт буюу жижиг цахилгаан машинд сууж очно. Мөн иргэний үнэмлэхээ заавал авч ирэхийг анхаарна уу. Бүсийн үйл ажиллагаатай наймдугаар сарын 28-н хүртэл танилцах боломжтой.

Хурлын 12 өдрийн туршид 480 зэрэгцээ арга хэмжээ зохион байгуулагдахаас гадна кино үзвэр, соёлын биет болон биет бус өвийн үзэсгэлэн зэрэг олон сонирхолтой арга хэмжээ зохион байгуулагдана. Ногоон бүсэд болох арга хэмжээнүүдийн хөтөлбөртэй энд дарж танилцана уу!