Хөнгөн атлетикийн тамирчид Макаогийн нээлттэй тэмцээнээс алт, мөнгөн медаль хүртжээ

Азийн хөнгөн атлетикийн холбооноос зохион байгуулсан Макао нээлттэй тэмцээн 2026 оны аравдугаар сарын 10-12-ны өдрүүдэд болж, Зүүн Азийн бүс нутгийн хөнгөн атлетикийн тамирчид хурд, хүч, ур чадвараа сорин өрсөлдлөө. Тус тэмцээнд Монгол Улсаа төлөөлөн оролцсон тамирчид амжилттай өрсөлдөж, алт, мөнгөн медаль хүртжээ.

Тэмцээний 200 метрийн зайн гүйлтэд “Алдар” спорт хороо, “Үчимбэр” клубын тамирчин, Олон улсын хэмжээний мастер Б.Солонго 24.96 секундын амжилтаа ахиулж, 24.68 секундэд барианд орсноор алтан медаль хүртлээ.

Харин МУБИС-ийн Биеийн тамирын сургуулийн “Үчимбэр” клубын тамирчин, Олон улсын хэмжээний мастер Ц.Мөнххэрлэн 25.54 секундын амжилт үзүүлж, мөнгөн медалийн эзэн болжээ.

Зүүн Азийн бүс нутгийн тамирчид өргөн бүрэлдэхүүнээр оролцсон олон улсын чанартай энэхүү тэмцээн нь тамирчдын бэлтгэлжилт, ур чадвар, өрсөлдөх чадварыг сорихын зэрэгцээ олон улсын түвшинд туршлага хуримтлуулах, спортын харилцаа, хамтын ажиллагааг өргөжүүлэх чухал ач холбогдолтой.

Монголын тамирчид өрсөлдөөн өндөртэй тэмцээнд амжилттай оролцож, эх орныхоо нэрийг олон улсын спортын тавцанд өргөсөн нь онцлох амжилт боллоо. Тамирчдыг тус тэмцээнд МУБИС-ийн Биеийн тамирын сургуулийн хөнгөн атлетикийн багш А.Амгалан, Үйцай сургуулийн багш Г.Жанцандорж нар дасгалжуулан оролцуулжээ.