Монгол Улсын Засгийн газар 2026 оны төсвийн төслийг анх удаа иргэдийн саналд тулгуурлан боловсруулж, УИХ-д өргөн барилаа. Үүнтэй холбоотойгоор Ерөнхий сайд Г.Занданшатар болон танхимын гишүүдийн хамт 2026 оны нэгдсэн төсвийн төслийг олон нийтэд танилцууллаа.

Засгийн газраас хүн төвтэй төсөв боловсруулахын тулд бодлогын шинэчлэл хийж, иргэдийн хэрэгцээ, санал бодлыг төсвийн суурь баримт бичигт тусгасан нь энэ удаагийн төсвийн гол онцлог байлаа. Үүний зэрэгцээ Засгийн газрын зүгээс татварын бодлогод шинэчлэл хийж, хувийн хэвшил болон баялаг бүтээгчдэд ээлтэй, санхүүгийн таатай орчныг бүрдүүлэхийг зорилоо. Ингэхдээ төрийн оролцоог хумьж, хувийн хэвшлийг дэмжиж, бизнесийн орчныг сайжруулах, хөнгөлөлттэй нөхцөлөөр дэмжлэг үзүүлэхэд анхаарлаа.

Салбар бүрийн оновчтой төсөвлөлт хийхийн тулд иргэдийн саналд тулгуурлан төсвийн хэлэлцүүлгийг зохион байгуулсан бөгөөд эрүүл мэнд, боловсрол, эрчим хүчний салбаруудад хөрөнгө оруулалтыг нэмэгдүүлэх саналууд зонхилсон. Эдгээр саналыг Засгийн газар бүрэн тусган төсвийн төслөө УИХ-д өргөн бариад байна.

Түүнчлэн Онцгой байдлын салбарын чадавхыг бэхжүүлэх зорилгоор гамшгаас хамгаалах, аврах ажиллагааг шуурхай гүйцэтгэхэд шаардлагатай техник, тоног төхөөрөмжийг шинэчлэх хөрөнгө оруулалтыг нэмэгдүүлсэн. Тодруулбал, гал түймэртэй тэмцэх чадавхыг сайжруулахаар гал унтраах багаж хэрэгсэл, хамгаалах хэрэгслээр хангахын зэрэгцээ, алба хаагчдынхаа нийгмийн асуудлыг шийдвэрлэхэд онцгой анхаарал хандууллаа. Энэ нь гамшгийн эрсдэлийг бууруулах, сөрөн тэсвэрлэх чадавхыг бэхжүүлэх асуудлыг нэмэгдүүлэхэд ихээхэн ач холбогдолтой юм.

Монгол Улсын засгийн газар эдийн засгийг төрөлжүүлж, уул уурхайгаас хэт хамааралтай бүтцээс татгалзаж, аялал жуулчлал, хөдөө аж ахуй, хоршоо, мал аж ахуйн салбаруудыг дэмжих бодлогыг тууштай хэрэгжүүлж байна. Малчид, хоршоод, хөдөө аж ахуйн үйлдвэрлэл эрхлэгчдийн үйл ажиллагааг дэмжих чиглэлээр хөрөнгө оруулалт, зээлийн нөхцөлийг сайжруулах, зах зээлд гарахад нь туслах зорилгоор төсөвт тодорхой зохицуулалтуудыг тусгалаа.

Энэ бүх бодлого, арга хэмжээ нь иргэдийн амьжиргааг тогтворжуулж, эдийн засгийг дунд болон урт хугацаанд тогтвортой хөгжүүлэхэд чиглэж байгаа юм.