Хичээлийн шинэ жил эхэлж буй энэ өдрүүдэд нийтийн тээврийн ачаалал нэмэгддэг. 

Сургуулийн автобусны эрэлт хэрэгцээ, үйлчилгээний хүртээмжийг хэрхэн нэмэгдүүлэх, нийтийн тээврийн салбарын хэтийн төлөвлөлтийн талаар Нийтийн тээврийн бодлогын газрын дарга Г.Билгүүнтэй ярилцлаа.

-Нийтийн тээврийн үйлчилгээнд яг одоо хэдэн автобус явж байна вэ?

-Өнөөдрийн байдлаар нийтийн тээврийн үйлчилгээнд өдөр тутам 139 чиглэлд 1086 тээврийн хэрэгсэл үйлчилгээ үзүүлдэг. Нийтийн тээврийн бүртгэлийн санд үйлчилгээ эрхлэгч 17 аж ахуйн нэгж байгууллагын 1311 тээврийн хэрэгсэл бүртгэлтэй байгаа бөгөөд парк ашиглалтын коэффициент 0.89 хувь байна

-Хичээлийн шинэ жил эхэлж буйтай уялдуулж автобусны тоог нэмэгдүүлэх үү?

-Энэ жил ерөнхий боловсролын 340 сургуульд 422851 хүүхэл суралцана. Үүнээс нэгдүгээр ангид 37926 суралцагч элсэн суралцаж байна. Оюутан,сурагчдын амралт болон хичээл эхлэх үетэй холбоотойгоор нийтийн тээврээр үйлчлүүлэгчдийн тоо хавар багасаж, намарт нийслэлийн хэмжээнд зорчигч урсгал нэмэгддэг. Иймд зорчигчдын эрэлт хэрэгцээ, чиглэлийн ачаалал, зорчигч урсгалын судалгаа болон оргил цагийн ачаалалтай уялдуулан нийтийн тээврийн үйлчилгээний хүртээмжийг нэмэгдүүлэх зорилгоор нийт 62 чиглэлд ажлын өдөр 86, амралтын өдөр 70 тээврийн хэрэгслээр нэмэгдүүлж, үйлчилгээнд гарахад бэлэн болсон.

-Сургуулийн автобусны хүртээмж хэр байгаа вэ. Цаашдаа автобусны тоог нэмэгдүүлэх боломжтой юу?

-Өнөөдрийн байдлаар сургуулийн автобусны үйлчилгээнд ерөнхий боловсролын 64 чиглэлд, 67автобус, 84 сургуульд үйлчлэхэд бэлэн болсон бөгөөд өдөр тутам дунджаар 5000 орчим хүүхдийг тээвэрлэдэг.

Улаанбаатар хотын хэмжээнд ерөнхий боловсролын нийт 340 сургууль байгаагийн 178 нь төрийн өмчит сургууль. Эдгээр сургуульд 67 автобус үйлчилдэг. Харин 162 хувийн өмчит сургуульд 157 автобус үйлчилнэ.

Нийт төрийн өмчит сургуульд сурч буй бага ангийн сурагчдын 3.2 хувьд сургуулийн автобусны үйлчилгээ хүрч байгаа бөгөөд парк шинэчлэлтийн хүрээнд сургуулийн автобусыг нэмэгдүүлснээр энэ тоо 2027 онд 5 хувь болж өсөх боломж бүрдэнэ.

Жил бүр сургуулийн автобусны тоог нэмэгдүүлснээр 5 жилийн хугацаанд бага ангийн сурагчдын 15 хувьд сургуулийн автобусны үйлчилгээ хүрэх боломж бүрдүүлэхээр зорин ажиллаж байна.

-Нийгмийн сүлжээнд иргэд өөрсдийн амьдарч буй орчиндоо шинэ чиглэл нээж өгөх хүсэлт олноор гаргах юм. Мэдээж хүн бүхний хүсэлтийн дагуу чиглэл нээх боломжгүй ч бас судалдаг байх?

-Тэгэлгүй яах вэ. Нийтийн тээврээр үйлчлүүлж буй иргэдэд илүү хүртээмжтэй байх үүднээс санал бүрийг судалж, суурьшлын бүсэд амьдарч буй иргэдийн тоог гаргах яаж хүртээмжтэй байлгах талаар судалгаа хийж ажилладаг. Өнгөрсөн жилийн эцсийн статистик мэдээгээр Улаанбаатар хотод 1.6 сая буюу Монгол Улсын нийт хүн амын 48 хувь нь оршин сууж байгаа бөгөөд жилд дунджаар гурав орчим хувиар өсөж байгаа үзүүлэлттэй байна. Нийслэл хотын суурьшлын бүс өдрөөс өдөрт нэмэгдэж, хотын зах руу суурьшил шинээр бий болж байгаа ба хотын дотор шинэ хороолол, шинэ авто замын сүлжээ бий болж байгаатай уялдуулан нийтийн тээврийн үйлчилгээний цар хүрээг нэмэх, ,чанарыг сайжруулах хэрэгцээ шаардлага байнга гарч байдаг.

-Нийтийн тээврийн парк шинэчлэлтийг энэ жил хийх үү. Цаашдын төлөвлөлтийн талаар мэдээлэл өгнө үү?

-Нийслэлийн нийтийн тээврийн салбар 2023-2025 онд их багтаамжийн дизель хөдөлгүүртэй 600, хот орчмын ачаа тээш хадгалах хэсэгтэй их багтаамжийн 10, их багтаамжийн угсраа 31, бүрэн цахилгаан 15, нийт 656 автобусаар парк шинэчлэлт тус тус хийсэн.

2026 онд нийтийн тээврийн үйлчилгээний 156 автобусаар парк шинэчлэлт хийхээр төлөвлөсөн. Тухайлбал, дунд багтаамжийн 46, их багтаамжийн 60, сургуулийн 50 автобусаар парк шинэчлэлт хийнэ.

Парк шинэчлэлтийг хийснээр нийтийн тээврийн үйлчилгээний хүртээмж нэмэгдэх, гэр хорооллын үйлчилгээ хүрээгүй цэгт шинээр чиглэл нээх, үйлчилгээний хэвийн байдал хангагдах үр дүнтэй. Түүнчлэн гэр хорооллын суурьшлын цэгт таван чиглэл шинээр нээх, зорчигч урсгалын ачаалал, багтаамж ашиглалтын коэффициентэд тулгуурлан таван чиглэлийн тээврийн хэрэгслийн төрлийг өөрчлөх, сургуулийн автобусны 30 чиглэл шинээр нээх боломжтой болно.

Нийтийн тээврийн үйлчилгээг иргэдэд хүрсэн, чанартай, аюулгүй, хүртээмжтэй болгохоор цаашид илүү сайжруулахын төлөө манай хамт олон хичээн ажиллаж байна.

Эх сурвалж: Нийтийн тээврийн бодлогын газар