Баянхошуу, Шархад дэд төвийн 454 айлын Ногоон орон сууцны барилгын ажил үргэлжилж байна

Нийслэлийн Баянхошуу, Шархад дэд төвд хэрэгжүүлж буй “Улаанбаатар хотын ногоон орон сууц” төсөл нь Азийн хөгжлийн банк болон Уур амьсгалын ногоон сангийн санхүүжилтээр хэрэгжиж буй бөгөөд гэр хорооллын бүсэд ногоон орон сууц бүхий эко хороолол байгуулах зорилготой юм.

Төслийн хүрээнд Баянхошуу, Шархад дэд төвүүдэд нийт 5,000 айлын орон сууц барихаар төлөвлөсөн.

Одоогийн байдлаар Баянхошуу, Шархад дэд төвийн эхний ээлжийн нийт 220 айлын орон сууцны ажил бүрэн дуусаж, дараагийн ээлжийн 454 айлын орон сууцны барилга угсралт, гадна тохижилтын ажил үргэлжилж байна.

Баянхошуу дэд төвийн эхний ээлжийн 4 блок, 110 айлын орон сууцны барилга угсралт, гадна тохижилтын ажил бүрэн дуусаж, 2025 оны есдүгээр сарын 24-нд Улсын комисст хүлээлгэн өгсөн бөгөөд оршин суугчид орон сууцандаа нүүж орж эхэлсэн. Дараагийн ээлжийн 6 блок, 226 айлын орон сууцны барилга угсралт, гадна тохижилтын ажил 80 гаруй хувийн гүйцэтгэлтэй үргэлжилж байна.

Шархад дэд төвийн эхний ээлжийн 4 блок, 110 айлын орон сууцны барилга угсралт, гадна тохижилтын ажил бүрэн дуусаж, 2026 оны долоодугаар сарын 3-нд Улсын комиссын хурлаар байнгын ашиглалтад хүлээн авах шийдвэр гарсан. Орон сууцыг Нийслэлийн орон сууцны корпораци (НОСК)-д хүлээлгэн өгөхөд бэлэн болоод байна. Харин хоёрдугаар ээлжийн 6 блок, 228 айлын орон сууцны барилга угсралт, гадна тохижилтын ажил 90 гаруй хувийн гүйцэтгэлтэй үргэлжилж байна.

Ногоон орон сууц төслийн гол онцлог нь орон сууцны хүртээмжийг нэмэгдүүлэхийн зэрэгцээ эрчим хүч, ус болон бусад нөөцийн хэрэглээг бууруулах, байгаль орчинд ээлтэй шийдлүүдийг барилгын зураг төсөл, инженерийн дэд бүтцэд тусгасанд юм. Тухайлбал, орон сууцанд саарал ус дахин ашиглах систем нэвтрүүлж, ахуйн хэрэглээнээс гарсан усыг боловсруулан ариун цэврийн байгууламжид дахин ашиглах боломжийг бүрдүүлж байгаа бөгөөд барилгын дулаан тусгаарлалтыг сайжруулах, эрчим хүчний хэмнэлттэй тоног төхөөрөмж ашиглах, усны хэрэглээг бууруулах шийдлүүдийг тусгасан нь ашиглалтын үеийн нөөцийн хэрэглээг багасгах ач холбогдолтой.

Тус төсөл нь гэр хорооллын иргэдийг ногоон, эрчим хүчний хэмнэлттэй орон сууцаар хангахын зэрэгцээ хотын төвлөрлийг сааруулах, инженерийн дэд бүтцийн хүртээмжийг нэмэгдүүлэх, байгаль орчинд үзүүлэх сөрөг нөлөөллийг бууруулах зорилготой юм.