, УБ
, УБ
Ойрх Дорнод тэр дундаа Израилийн ирээдүйн дөрвөн жилийг шийдвэрлэх сонгууль өнөөдөр /2026.10.27/ болж байна.
Энэ удаагийн сонгуулийг 2023 оны аравдугаар сарын 7-ны ХАМАС-ын халдлага болон үүний дараа өрнөсөн дайнуудын талаарх эрх баригчдын бодлогод сонгогчид дүн тавих үйл явдал гэж олон улсын ажиглагчид үзэж байгаа юм.
Сонгуульд Израилийн одоогийн Ерөнхий сайд Биньямин Нетаньяху тэргүүлдэг Ликуд нам болон Израилийн Батлан хамгаалах хүчний жанжин штабын даргаар ажиллаж байсан Гади Айзенкот Яшар нам, 2022 онд ерөнхий сайдаар ажиллаж байсан Нафтали Беннетт, Яир Лапид зэрэг улс төрчид өрсөлдөж байна. Тэр дундаа Гади Айзенкот хүчтэй сөрөг хүчин болж буй нь урьдчилсан санал асуулгаар гарчээ.
Мөн урьдчилсан санал асуулгаас харахад сонгогчдын шийдвэрт улс орны аюулгүй байдал, Газын зурвасын дайн, Ирантай харилцах бодлого, цэргийн албаны асуудал болон Нетаньяхугийн удирдлагад тавих улс төрийн хариуцлага зэрэг сэдэв нөлөөлсөн байна.
Израилийн парламент буюу Кнессет нийт 120 суудалтай. Засгийн газар байгуулахын тулд парламентын 61-ээс доошгүй гишүүний дэмжлэг авах шаардлагатай. Тиймээс хамгийн олон санал авсан нам дангаараа Засгийн газар байгуулах боломж бүрдэхгүй тохиолдолд намууд эвсэн засгийн газраа байгуулдаг аж.
Сонгуулийн өмнөх санал асуулгууд Нетаньяхугийн эвсэл олонхын суудлаа хадгалахад хүндрэлтэй байж болзошгүйг харуулсан ч сөрөг хүчнийхэн Засгийн газар байгуулах олонхыг бүрдүүлж чадах эсэх нь ч мөн тодорхойгүй хэвээр байна. Товчхондоо энэ удаагийн сонгуульд нэг нам дангаар засаг байгуулах хэмжээнд суудал авах боломжгүй гэнэ.
Санал хураалт дууссаны дараа телевизүүд урьдчилсан санал асуулгад тулгуурласан таамаг дүн танилцуулах бөгөөд албан ёсны үр дүнг арваннэгдүгээр сарын 4-нд гарах юм.
Энэ сонгуулийн үр дүн Израилийн дотоод улс төрөөс гадна Газын зурвас дахь мөргөлдөөн, Палестины асуудал, Ирантай харилцах харилцаа болон АНУ-тай хэрэгжүүлэх бодлогод нөлөөлж болзошгүй. Хэрэв Нетаньяху ялбал Израиль Трамптай хамтран, Ирантай хийх дайны хүрээгээ улам тэлнэ гэх таамгийг олон улсын ажиглагчид бичиж байгаа юм.
Эргэн сануулахад, 2023 онд Палестины Хамас бүлэглэл Газын зурвасаас Израиль руу гэнэтийн, өргөн хүрээтэй халдлага үйлдэж 1200 гаруй хүн амиа алдаж, 15 мянга орчим хүн шархдаж байсан юм. Улмаар Газын зурваст Израилийн цэргийн өргөн хүрээтэй ажиллагаа эхлэхэд хүргэсэн.
Эх сурвалж: reuters.com, abcnews
