, УБ
, УБ
АНУ-ын никотин, тамхины судалгааны 24 шинжээч никотинтой цахилгаан тамхийг насанд хүрсэн тамхичдад санал болгох боломжит хувилбаруудын нэг болгон эмч, өвчтөний ярилцлагад багтаахыг зөвлөжээ.
JAMA сэтгүүлд нийтлэгдсэн зөвлөмжийг Society for Research on Nicotine and Tobacco байгууллагаас бүрдүүлсэн ажлын хэсэг боловсруулсан байна. Шинжээчид цахилгаан тамхийг варениклин, бупропион, никотины бохь, наалт зэрэг нотолгоонд суурилсан бусад аргын хамт бодитойгоор тайлбарлах хэрэгтэй гэж үзжээ.
Тэдний онцолсноор янжуурын шаталтаас үүсдэг бодисууд тамхитай холбоотой өвчлөл, нас баралтын үндсэн шалтгаан болдог. Цахилгаан тамхи эрсдэлгүй биш ч түүний болзошгүй эрсдэл нь утаат янжуурыг үргэлжлүүлэн татах эрсдэлээс хавьгүй бага байна.
Зөвлөмжид:
• өвчтөний зорилго, сонголтыг харгалзан бүх боломжит аргыг тайлбарлах;
• цахилгаан тамхи сонгосон бол янжуурыг бүрэн орлуулах;
• хоёр бүтээгдэхүүнийг удаан хугацаанд зэрэг хэрэглэхээс зайлсхийх;
• зан үйлийн зөвлөгөө, мэргэжлийн дэмжлэгтэй хослуулахыг санал болгожээ.
Энэхүү зөвлөмж нь тамхи татдаггүй хүн, хүүхэд, залуусыг никотин хэрэглэж эхлэхийг дэмжээгүй. Зөвхөн янжуураас гарахыг хүсэж буй насанд хүрсэн тамхичдад чиглэсэн бөгөөд цахилгаан тамхи одоогоор АНУ-д тамхинаас гаргах эмийн зөвшөөрөл аваагүйг мөн тодотгосон байна.
Судлаачдын гол санаа нь энгийн: “насанд хүрсэн тамхичны хувьд цахилгаан тамхийг “юу ч хэрэглэхгүй байх”-тай бус, утаат янжуурыг үргэлжлүүлэн татахтай харьцуулан эрсдэлийг үнэлэх ёстой” гэж дүгнэжээ.
Сүүлийн жилүүдэд АНУ-д утаат тамхидалтын түвшин түүхэн доод хэмжээндээ хүрсэн бөгөөд цахилгаан болон халаадаг тамхины хэрэглээ өсч буй нь үүний нэг шалтгаан гэж тайлбарадаг байна.
Эх сурвалж: University of Maryland School of Medicine
