Нийслэлийн орлогын бүрдүүлэлт 81.7%, зарлагын гүйцэтгэл 78.6 хувьтай байна

Төрийн ордонд "Нийслэлийн 2024-2026 оны төсвийн зарцуулалт, хөрөнгө оруулалтын төслүүдийн хэрэгжилт, холбогдох хууль тогтоомжид нийцсэн байдал" сэдэвт ерөнхий хяналтын сонсгол яг одоо болж байна. Энэ үеэр нийслэлийн 2026 оны төсөвтэй холбоотой хийсэн танилцуулгаас хүргэе.

Нийслэл хотын төсвийн орлогыг татварын 17, татварын бус 8 нийт 25 орлогоор татан төвлөрүүлж байна. 2026 онд татварын орлогоор 4.2 их наяд төгрөг, татварын бус орлогоор 1.1 их наяд нийт 5.4 их наяд төгрөг төвлөрүүлэхээр төлөвлөснөөс тавдугаар сарын гүйцэтгэлээр 81.7%-ийн бүрдүүлэлттэй байна. Үүнд ХХОАТ-аар 58 хувийг, ААНОАТ-аар 29 хувийг бүрдүүлнэ.

Төсвийн тухай хуульд 2021 онд оруулсан нэмэлт өөрчлөлтөөр 2022 оноос эхлэн ААНОАТ-ын 40 хувийг нийслэлийн төсөвт төвлөрүүлэхээр хуульчилсантай холбоотойгоор томоохон өөрчлөлт орсон. Судалгаанаас харахад нийслэлийн орлого жил бүр тогтвортой өссөн үзүүлэлттэй байна.

Эхний таван сарын байдлаар зарлагын гүйцэтгэл 78.6%-тай байна. Төсвийн урсгал зардлын төлөвлөгөөг авч үзвэл, хот тохижуулалтын зардалд 24.6 хувь буюу 495.2 тэрбум төгрөг, нийтийн тээврийн алдагдлын татааст 18.8 хувь буюу 377.6 тэрбум төгрөг, цалин хөлс, урамшуулал, нийгмийн даатгалд төлөх шимтгэлд 329.2 тэрбум төгрөг, байр ашиглалттай холбоотой тогтмол зардалд 161.8 тэрбум төгрөг, бусад зардалд 216.9 тэрбум төгрөг, гэмт хэргээс урьдчилан сэргийлэхэд 79.7 тэрбум төгрөг, КОП-17 хуралд 70.1 тэрбум, дамжуулан зээлдүүлсэн зээл 95.8 тэрбум, Засаг даргын нөөц санд 36 тэрбум төгрөг, агаарын бохирдлыг бууруулахад 52.3 тэрбум төгрөг төсөвлөжээ. 

Хөрөнгө оруулалтын зардлын батлагдсан төлөвлөгөөгөөр нийт 5 их наяд төгрөг баталснаас тайлант хугацаанд 629.8 тэрбум төгрөг буюу 12.4 хувийн биелэлттэй байна. Нийт гүйцэтгэлээр нь авч үзвэл 90.9 хувийг нийслэлийн хөрөнгө оруулалтын зардал эзэлж байна. 2024-2026 онд нийт хөрөнгө оруулалтын гүйцэтгэл 1.4 их наяд байсан бол 2026 онд 4.6 их наяд төгрөгт хүрч, үнэт цаасны эх үүсвэрээр хэрэгжиж буй томоохон мега төслүүд хэрэгжүүлж байгаатай холбоотой байна. Нийслэлийн төсвийн хөрөнгө оруулалтаар 2026 онд 3.1 их наяд төгрөгийг зарцуулахаар төлөвлөсөн бол 1.5 их наяд төгрөгөөр нийслэлийн үнэт цаасаар хэрэгжүүлнэ.