Цөлжилттэй тэмцэх тухай НҮБ-ын Конвенцын Талуудын 17 дугаар бага хурлын хүрээнд “From Summits to the Floodplains: Connecting Ecosystems and Livelihoods” сэдэвт хэлэлцүүлгээр газар, усны нөөцийг уулын эхээс голын сав, бэлчээр, тариалангийн бүс, ус намгархаг газар хүртэл нэгдсэн байдлаар удирдах шаардлагын талаар хэлэлцлээ.

Хэлэлцүүлэгт газрын доройтол, ган, усны нөөцийн хомсдол болон захиргааны хил хязгаараас үүдсэн менежментийн хүндрэлүүдийг онцолж, экосистемүүд харилцан хамааралтай учраас нэг хэсэгт хэрэгжүүлсэн хамгаалалт, нөхөн сэргээлт нь бусад бүсэд ч үр өгөөжтэй болохыг оролцогчид тодотгов.

Монгол Улсын хувьд Ус ба газрын нэгдсэн менежментийн санаачилгыг Тал хээрийн төлөвлөгөө буюу Steppe Action Agenda-гийн хүрээнд хэрэгжүүлэхээр санал болгож байгаа бөгөөд газар нөхөн сэргээх хөрөнгө оруулалтыг усны аюулгүй байдал, ганд тэсвэртэй байдлыг нэмэгдүүлэх хөрөнгө оруулалттай уялдуулах зорилготой юм.

Мөн хэлэлцүүлгээр:

Байгаль орчин, ус, хөдөө аж ахуй зэрэг салбарын байгууллагуудын уялдаа холбоог сайжруулах;

Үндэсний болон орон нутгийн түвшинд хамтарсан төлөвлөлт, санхүүжилтийн тогтолцоо бий болгох;

Малчид, тариаланчид, эмэгтэйчүүд, залуучууд болон орон нутгийн иргэдийн оролцоог нэмэгдүүлэх;

Тогтвортой газар ашиглалтыг дэмжсэн экосистемийн үйлчилгээний төлбөр, үр дүнд суурилсан санхүүжилт зэрэг механизмыг хөгжүүлэх;

Улс хоорондын усны сав газарт мэдээлэл солилцох, хамтын ажиллагааг бэхжүүлэх шаардлагатайг онцоллоо.

Уулын эхээс үерийн татам хүртэл газар, усыг тус тусад нь бус, харилцан холбоотой нэг систем гэж үзэн удирдах нь усны аюулгүй байдал, хүнсний аюулгүй байдал, малчдын амьжиргаа болон уур амьсгалын эрсдэлийг даван туулах чадварыг нэмэгдүүлэх чухал нөхцөл юм.