Боловсролын яам, Боловсролын судалгааны үндэсний хүрээлэн, Боловсролын үнэлгээний төвөөс Монгол Улсын PISA-2025 үнэлгээний үндэсний үр дүнгийн талаар зөвлөлдөх цуврал уулзалтыг зохион байгуулж байна.

Энэ удаагийн зөвлөлдөх уулзалтад Боловсролын ерөнхий газар, Боловсролын магадлан итгэмжлэлийн үндэсний зөвлөл, Боловсролын зээлийн сан, Боловсролын мэдээллийн технологийн төв, нийслэлийн Боловсролын газар, дүүргийн Боловсролын хэлтэс, Medle цахим сургуулийн нийт 70 гаруй төлөөлөл оролцлоо.

Уулзалтаар PISA-2025 онцлог, үр дүн, PISA-2022-оос хойш гарсан үр дүн, ололт амжилт, алдаа оноог ярилцаж, оролцогчид байгууллагууд чиг үүргийн хүрээнд PISA үнэлгээний өгөгдөлд нарийвчилсан дүн шинжилгээ хийх, Тухайлбал, өндөр амжилт үзүүлсэн сургууль, багш, суралцагчдыг судлах, түгээн дэлгэрүүлэх, нийгэм-эдийн засгийн үзүүлэлтээр ялгаатай байгаа суралцагчдын хөгжилд онцгойлон анхаарч хамтран ажиллах чиглэлээр зөвлөлдлөө.

PISA-2025 нь 2022 оны үнэлгээтэй харьцуулахад математик, уншаад ойлгох зэрэг үндсэн үзүүлэлт тогтвортой хадгалагдаж, байгалийн ухааны дундаж оноо 2022 оныхтой харьцуулахад 12 оноогоор өсч, суралцагчдын сургуульд хандах хандлага, сэтгэл ханамжийн индекс 2022 онд 7.2 байсан бол 2025 онд 7.8 болж өссөн, нийслэл, аймгийн суралцагчдын гүйцэтгэлийн зөрүү багассан зэрэг эерэг үр дүн гарсан. Гэсэн хэдий ч Монгол сурагчдын уншиж ойлгох чадвар (Reading literacy) хамгийн их анхаарал татсан, сайжруулах шаардлагатай үндсэн асуудал хэвээр байна. 

Монгол Улсын 15 настай сурагчид уншиж ойлгох чадварын сорилоор 374 оноо авсан нь ЭЗХАХБ (OECD)-ын орнуудын дунджаас эрс доогуур үзүүлэлт юм. 

Боловсролын салбарын мэргэжилтнүүдийн үзэж байгаагаар сурагчдын уншиж ойлгох чадварыг сайжруулснаар бусад бүх хичээлийн (математик, байгалийн ухааны бодлого бодох) амжилт дагаж өсөх зүй тогтолтой тул сургалтын хөтөлбөрийн шинэчлэлийн энэ чиглэлд өөрчлөх шаардлага тулгарч байгаа талаар санал солилцлоо.