Анагаахын Шинжлэх Ухааны Үндэсний Их Сургуулийн Анагаах Ухааны сургуулийн Эх барих, эмэгтэйчүүд судлалын тэнхим үүсгэн байгуулагдсаны түүхт 80 жилийн ой тохиож байна.
Тус тэнхим нь 1946 онд байгуулагдсан цагаасаа эхлэн Монгол Улсад эх барих, эмэгтэйчүүд судлалын мэргэжлийн сургалт, эмнэлзүйн тусламж үйлчилгээ, эрдэм шинжилгээний ажлын үндэс суурийг тавьж, олон зуун эмч, багш, судлаач мэргэжилтэн бэлтгэн төгсгөжээ.
Тэнхимийн хөгжилд анхны эрхлэгч, Монгол Улсын Гавьяат багш, профессор М.Дамба, Хөдөлмөрийн баатар, Ардын эмч, профессор Б.Жав, Хүний гавьяат эмч, профессор Д.Цэвэлмаа болон үе үеийн эрдэмтэн багш, эмч нар үнэтэй хувь нэмэр оруулсан юм.
Өнөөдөр тус тэнхим эх, ургийн анагаах ухаан, дурангийн болон роботын тусламжтай мэс засал, үргүйдлийн оношилгоо, эмчилгээ, үр хөврөл судлал зэрэг анагаах ухааны дэвшилтэт чиглэлүүдийг хөгжүүлж, сургалт, эрдэм шинжилгээ, эмнэлзүйн тусламж үйлчилгээг уялдуулан ажиллаж байна.
АШУҮИС-ийн ректор, АУ-ны доктор, профессор Б.Дамдиндорж 80 жилийн ойн мэндчилгээндээ эх, нярай, эмэгтэйчүүдийн эрүүл мэндийг хамгаалах үйлсэд хүчин зүтгэсэн үе үеийн эрдэмтэн багш, эмч, мэргэжилтнүүдэд талархал илэрхийлж, цаашид эх, ургийн анагаах ухаан, эмэгтэйчүүд судлалын боловсрол, эрдэм шинжилгээ, инновацыг хөгжүүлэхийн чухлыг онцоллоо.
Тус тэнхимийн 80 жилийн ой нь Монгол Улсад эх барих, эмэгтэйчүүд судлалын салбарыг хөгжүүлэхэд оруулсан үе үеийн мэргэжилтнүүдийн хөдөлмөр, бүтээлийг алдаршуулж, үнэт өв, мэдлэг туршлагыг хойч үедээ өвлүүлэх чухал үйл явдал юм.




