Монгол Улсын Засгийн газрын гишүүн, Зам тээврийн сайд Б.Дэлгэрсайхан, Төмөр замын газрын дарга Б.Артур, “Монголын төмөр зам” ТӨХК-ийн Гүйцэтгэх захирал О.Батчулуун тэргүүтэй төлөөлөгчид Монголын төлөөлөгчид энэ сарын 21-24-ний өдрүүдэд БНХАУ-д ажиллаж, хоёр улсын тээврийн салбарын хамтын ажиллагаа болон хэрэгжиж буй төмөр замын төслүүдийн талаар уулзалт, хэлэлцээ хийж байна.

Айлчлалын эхний өдөр Монголын талын төлөөлөгчид БНХАУ-ын “Чайна Энержи Инвестмент Групп” ХХК-ийн дэд ерөнхий захирал Фү Жэньбан тэргүүтэй төлөөлөгчидтэй уулзжээ.

Уулзалтаар Гашуунсухайт-Ганцмод боомтын хил дамнасан төмөр замын төслийн хэрэгжилт, нүүрс тээврийн хамтын ажиллагаа болон төмөр замын хөдлөх бүрэлдэхүүний шинэчлэлийн асуудлаар санал солилцсон байна.

Түүнчлэн Шивээхүрэн-Сэхээ, Бичигт-Зүүнхатавч, Ханги-Мандал чиглэлийн бусад хил дамнасан төмөр замын төслүүдийг үе шаттай урагшлуулах шаардлагатайг талууд онцолжээ.

Мөн төмөр замын бүтээн байгуулалтыг эрчимжүүлэх, нүүрс тээврийн хамтын ажиллагааг өргөжүүлэх, цаашид тээврийн хүчин чадлыг нэмэгдүүлэх чиглэлээр хамтран ажиллах боломжийг үргэлжлүүлэн судалж, тодорхой шийдэлд хүрэхээр санал нэгдсэн байна.