АШУҮИС-ийн Монгол-Японы эмнэлэг нь “Эрүүл мэндийн технологи – 2026” үзэсгэлэнд АШУҮИС-ийн харьяа эмнэлгүүдийн хамт оролцож, 2025-2026 онд эмнэлзүйн анагаах ухааны 9 салбарт амжилттай нутагшуулсан 14 шинэ технологиороо “Шилдэг технологи нэвтрүүлэгч байгууллага” хүндэт өргөмжлөлийн эзэн боллоо.

Тус эмнэлэг нь 2026 оны 9-р сарын байдлаар оношилгоо, эмчилгээний 10 шинэ технологи нэвтрүүлснээс 4 нь Монгол Улсад анх удаа нэвтэрсэн эмнэлзүйн болон лабораторийн дэвшилтэт аргууд юм. Энэхүү нэр хүндтэй шагналыг хүртэх гол шалгуурт Уушги судлалын салбарын профессорын баг, Ц.Маналжав, Г.Амартүвшин нарын Монгол Улсад анх удаа нэвтрүүлсэн “Цулцангийн протеинозийн үед уушги бүтэн угаах эмчилгээ” түүчээлсэн бөгөөд энэ нь иргэдийг гадаадад өндөр зардлаар эмчлүүлэх урсгалыг бууруулж, эх орондоо чанартай тусламж авах боломжийг бүрдүүлснээрээ онцлог байлаа.

ҮЗЭСГЭЛЭНГИЙН ҮЕЭРХ ОНЦЛОХ ҮЙЛ АЖИЛЛАГАА: Үзэсгэлэнд Монгол-Японы эмнэлгийн 21 эмч, эмнэлгийн мэргэжилтний бүрэлдэхүүнтэй баг ажиллаж, 860 гаруй иргэнд Tanita аппаратаар биеийн ерөнхий үзүүлэлтийг хэмжих болон RetCAD хиймэл оюун ухаанд суурилсан нүдний угийн зураг шинжлэх технологиор нүдний эрүүл мэндийн үзлэг, оношилгоог үнэ төлбөргүй хийж үйлчиллээ.

Мөн тус үзэсгэлэнгийн үеэр манай эмнэлгийн тэргүүлэх эмч, судлаачид дараах сэдвүүдээр илтгэл хэлэлцүүлэв:

АУ-ны доктор, профессор Ц.Одгэрэл (Гемофилийн төвийн эрхлэгч): "Саатуулагч үүссэн гемофилийн тохиолдолд эсрэг биеийн эмчилгээг нэвтрүүлсэн үр дүн"

АУ-ны доктор Б.Саруулжавхлан (Дурангийн тасгийн эмч): "Ходоодны хорт хавдраас урьдчилан сэргийлэлт ба хеликобактерийн халдвар"

АУ-ны доктор О.Зэсэмдорж (Эмнэлзүйн төв лабораторийн эрхлэгч): "Бичил биетнийг зүйлийн түвшинд ялган дүйхэд масс спектрометрийн аргыг ашиглах нь"

СҮҮЛИЙН 3 ЖИЛД НУТАГШУУЛСАН 30 ГАРУЙ ОНЦЛОХ ТЕХНОЛОГИ: Сүүлийн 3 жилийн хугацаанд тус эмнэлэг дараах дэвшилтэт технологиудыг тусламж үйлчилгээндээ бүрэн нэвтрүүлээд байна. Үүнд: Өвдөгний хиймэл үеийг роботик гарын тусламжтай суулгах, нарийн гэдэсний double balloon дуран, урт хугацааны видео хяналтат тархины цахилгаан бичлэг, эпилепсийн мэс засал, Prisma flex аппаратаар билирубин шүүх, глаукомын шинэ дэвшилтэт мэс засал болон сонгомол лазер трабекулопласти, уродинамик шинжилгээ, гуурсан хоолойн уян дурангаар гуурсан хоолой бөглөх, дунгийн суулгац, Пейсмейкер (Pacemaker) суулгах, бөөрний эдийн биопси, хамрын таславчийн цоорлыг элхэгийн урд артерийн далбан ашиглан нөхөх, гүрээний биеийнцэрийн хавдрыг зүрхний мэс заслын шунт ашиглан авах, сакрокольпопекси мэс засал, SIBO буюу нарийн гэдсэнд эмгэг нян ургалтын хам шинжийн оношилгоо, нойрны бичлэг (полисомнографи), гемофилийн рекомбинант факторын болон эсрэг биеийн эмчилгээ, зүрхний стрэйн хэт авиан оношилгоо болон хэмийн аблаци эмчилгээ, үтрээгээр дамжих дурангийн мэс засал (vNOTES), нүдний торлог, шилэнцрийн мэс засал, ходоодны шүүсэнд хеликобактер, кларитромицины тэсвэржилтийг илрүүлэх, улаан хоолойн ахалази өвчнийг эмчлэх POEM, ходоод, улаан хоолойн сөргөө өвчний дурангийн минимал инвазив эмчилгээ, бактериологийн ялган дүйх MALDI-TOF аппаратын оношилгоо, шамбарам болон бөөрний хавдрыг өндөр давтамжит долгионоор түлэх судсан дотуурх эмчилгээ зэрэг багтаж байна.

Ивээн тэтгэлэгт мэдээ