, УБ
, УБ
OpenAI-ийн бүтээсэн хиймэл оюуны агент Австралийн Засгийн газрын Эрүүл мэндийн статистикийн цахим системд зөвшөөрөлгүй нэвтэрсэн талаар Австралийн Ерөнхий сайд Энтони Албаниз мэдээллээ.
Тэрээр энэ тухай Нью-Йорк хотноо үргэлжилж буйг НҮБ-ын ерөнхий ассамблейн чуулганы үеэр зохион байгуулагдсан хэвлэлийн хуралд оролцох үеэрээ зарласан юм.
Уг үйл явдал 2026 оны зургаадугаар сарын 18-нд болсон бөгөөд Австралийн хиймэл оюун ухааны төрийн үйлчилгээний байгууллагын хариуцдаг Эрүүл мэндийн статистикийн цахим системд нэвтэрч, нийтэд нээлттэй болон нээлттэй бус зарим файлд хандсан байна. Одоогоор иргэдийн хувийн Эрүүл мэндийн бүртгэл, өвчтөний мэдээлэл алдагдсан гэх нотолгоо байхгүй гэж Австралийн тал мэдэгдээд байна.
OpenAI уг зөрчлийг наймдугаар сард хиймэл оюуны загваруудын “зорилгоос гажсан үйл ажиллагаа”-г шалгах явцдаа илрүүлжээ. Гэвч Австралийн Засгийн газарт есдүгээр сарын 10-нд, буюу хэрэг гарснаас бараг гурван сарын дараа ерөнхий цахим шуудангаар мэдэгдсэн байна. Уг мэдээллийгАвстралийн төрийн үйлчилгэний байгууллага есдүгээр сарын 15-нд Австралийн кибер аюулгүй байдлын байгууллагад шилжүүлжээ.
Ерөнхий сайд Энтони Албаниз OpenAI-ийн гүйцэтгэх захирал Сэм Алтмантай энэ асуудлаар ярилцаж, мэдээллийг удаан хугацаанд нуун дарагдуулсан бус, харин хэт орой мэдэгдсэн явдал болон мэдээлсэн арга хэлбэрт Австралийн Засгийн газар “туйлын их санаа зовниж” байгаагаа илэрхийлсэн байна. Албанизын хэлснээр Алтман компанийн дотоод протоколтой холбоотой асуудал байсныг хүлээн зөвшөөрчээ.
Австралийн Засгийн газар уг тохиолдлыг шалгах тусгай ажиллагаа эхлүүлж, AI агент өөр төрийн системүүдэд нэвтэрсэн эсэхийг тогтоохоор ажиллаж байна. Reuters-ийн мэдээлснээр энэ нь хиймэл оюуны агент төрийн цахим системд өөрөө зөвшөөрөлгүй нэвтэрсэн дэлхийд ил болсон анхны тохиолдлуудын нэг байж болзошгүй байна.
Энэ хэрэг нь AI агентууд хүний шууд удирдлагагүйгээр интернет орчинд ажиллах үед ямар хэмжээний хяналт, хамгаалалт шаардлагатай вэ гэсэн асуудлыг дахин хурцаар тавьж байна.
