НҮБ-ын Хөгжлийн хөтөлбөр (UNDP) нь сүүлийн гурван жилийн хугацаанд Монгол Улсын эрчим хүчний шилжилтийг дэмжих чиглэлээр Эрчим хүчний яамны стратегийн түншээр ажиллаж, бодлого, эрх зүйн шинэчлэл, институцийн чадавхыг бэхжүүлэх, тогтвортой санхүүжилтийн механизм, шинэлэг технологийн шийдлүүдийг хөгжүүлэхэд дэмжлэг үзүүлэн Засгийн газрын Эрчим хүчний ногоон шилжилтийн стратегийг хэрэгжүүлэхэд ихээхэн хувь нэмэр оруулан ажиллаж байгаа билээ.

Эрчим хүчний яам, НҮБ-ын Хөгжлийн хөтөлбөр (UNDP) хооронд эрчим хүчний салбарын тогтвортой хөгжил, эрчим хүчний шилжилтийг дэмжих чиглэлээр хамтын ажиллагааг өргөжүүлэн хөгжүүлэх зорилго бүхий Хамтын ажиллагааны санамж бичигт талууд гарын үсэг зурлаа.

Санамж бичгийн хүрээнд тогтвортой бөгөөд шударга эрчим хүчний шилжилт, сэргээгдэх эрчим хүч, эрчим хүчний үр ашиг, инновац болон хүний нөөцийн чадавхыг бэхжүүлэх чиглэлээр хамтран ажиллаж, төсөл хөтөлбөрүүд хэрэгжүүлэхээр төлөвлөж байна.

Талууд энэхүү хамтын ажиллагааны хүрээнд Монгол Улсын эрчим хүчний ногоон шилжилтийг дэмжиж, цэвэр халаалтын шийдэл, шинэ технологи, хөрөнгө оруулалтын боломжийг хөгжүүлэхэд бодит хувь нэмэр оруулах юм.