, УБ
, УБ
Испанийн зүүн хэсгийн Теруэль мужаас ойролцоогоор 150 сая жилийн настай, Диплидокус /Diplodocus/ төрөлд хамаарах магадлалтай үлэг гүрвэлийн чулуужсан ясыг илрүүлжээ. Хэрэв ангилал нь бүрэн батлагдвал энэ нь Диплидокусийн Хойд Америкаас гадна олдсон анхны тохиолдол болж байгаа юм.
Судлаачид Эл Кастеллар суурины ойролцоох Ла Тежериа чулуужсан олдворын талбайгаас 14 ширхэг сүүлний нугалам болон сүүлний доод хэсгийн хэд хэдэн яс олсон байна. Эдгээрийг бусад сауропод үлэг гүрвэлийн чулуужсан ястай харьцуулж, филогенетикийн шинжилгээ хийсний үндсэн дээр Диплидокус төрөлд хамааруулжээ. Судалгааны үр дүнг 2026 оны есдүгээр сард Journal of Vertebrate Paleontology сэтгүүлд нийтэлсэн байна.
Тус үлэг гүрвэл нь урт хүзүү, маш урт сүүлтэй, дөрвөн хөлөөр явдаг өвсөн тэжээлт сауропод үлэг гүрвэл бөгөөд ойролцоогоор 150 сая жилийн өмнө, Юрийн галавын сүүл үед амьдарч байжээ. Нас бие гүйцсэн Диплидокус 20 гаруй метр урт хүрдэг байсан бөгөөд өмнө нь баталгаатай олдворууд нь зөвхөн Хойд Америкийн баруун хэсгээс илэрч байсан юм.
Испанийн олдворыг судалсан баг уг амьтныг ойролцоогоор 25 метр урт байсан гэж тооцоолж байна. Гэхдээ одоогоор зөвхөн сүүлний хэсгийн яс олдсон тул Диплидокусийн яг аль зүйл болохыг тогтоогоогүй бөгөөд "Diplodocus sp" гэж түр ангилжээ.
Энэ олдворын хамгийн чухал ач холбогдол нь Юрийн галавын үед Хойд Америк болон Европын хооронд үлэг гүрвэлүүд шилжин тархах боломжтой байсныг харуулах шинэ баримт болж буйд оршино. Тухайн үед Атлантын далай өнөөгийнх шиг бүрэн нээгдээгүй байсан бөгөөд хоёр тивийн хооронд арал болон түр зуурын хуурай газрын холбоосууд оршиж байсан байж болзошгүй гэж судлаачид үзэж байна.
Гэхдээ зарим палеонтологич зөвхөн сүүлний нугалам дээр үндэслэн Diplodocus гэж эцэслэн тогтооход одоогоор материал хангалтгүй гэж болгоомжилж байгаа юм. Тиймээс цаашид илүү бүрэн араг яс олдох эсэх нь уг нээлтийн ангиллыг эцэслэхэд чухал ач холбогдолтой байна.
Эх сурвалж: sciencemediacentre
