, УБ
, УБ
Эрүүл мэндийг дэмжих хөтөлбөрийн хүрээнд Хөвсгөл аймгийн Нэгдсэн эмнэлэгт 664.8 сая төгрөгийн үнэ бүхий эмнэлгийн тоног төхөөрөмж нийлүүлж, суурилуулжээ.
Тухайлбал, хэвлийн хөндийн мэс заслын дурангийн иж бүрдэл, нян судлалын шинжилгээний бүрэн автомат анализатор, нярайн шарлагын аппарат болон бусад шаардлагатай багаж, тоног төхөөрөмжийг хүлээлгэн өгсөн байна.
Хэвлийн хөндийн мэс заслын дурангийн иж бүрдлийг ашиглалтад оруулснаар өмнө нь Орхон аймаг болон Улаанбаатар хотыг зорьж хийлгэдэг байсан зарим төрлийн мэс заслыг Хөвсгөл аймагт хийх боломж бүрджээ. Тодруулбал, хэвлийн хөндийн болон эмэгтэйчүүдийн дурангийн мэс заслын тусламж, үйлчилгээг орон нутагт үзүүлэх нөхцөл бүрдсэн байна.
Ингэснээр иргэдийн мэс заслын тусламж, үйлчилгээ авах хүртээмж нэмэгдэхийн зэрэгцээ Улаанбаатар болон бусад аймгийг зориход зарцуулдаг цаг хугацаа, зардлыг хэмнэх боломжтой болж байна.
Мөн нян судлалын шинжилгээний бүрэн автомат анализаторыг ашиглалтад оруулснаар Хөвсгөл аймгийн Нэгдсэн эмнэлгийн лабораторийн оношилгооны чадавх сайжрах юм.
Уг төхөөрөмж нь шинжилгээний хугацааг богиносгох, оношилгооны нарийвчлалыг нэмэгдүүлэх, хүний үйл ажиллагаанаас шалтгаалах алдааны эрсдэлийг бууруулах давуу талтай. Түүнчлэн бичил биетний эсрэг эмийн тэсвэржилтийг илүү нарийвчлалтай тодорхойлох боломжтой аж.
Шинэ тоног төхөөрөмжүүдийг ашиглалтад оруулснаар Хөвсгөл аймгийн иргэд орон нутагтаа илүү олон төрлийн оношилгоо, мэс заслын тусламж үйлчилгээ авах боломж ийнхүү нэмэгдэж байна.
