, УБ
, УБ
БНХАУ-ын дарга Ши Жиньпин АНУ-ын Ерөнхийлөгч Дональд Трампын урилгаар есдүгээр сарын 23-аас 25-ны өдрүүдэд АНУ-д гэргий Пэн Лиюаний хамт төрийн айлчлал хийх гэж байна.
Энэ нь Ши Жиньпиний Вашингтонд сүүлийн арав гаруй жилийн хугацаанд хийж буй анхны төрийн айлчлал болж байна. АНУ-ын Ерөнхийлөгч Дональд Трамп түүнийг Жойнт Бэйес Авардс нисэх хүчний баазад биечлэн угтахаар төлөвлөсөн бөгөөд дараа нь Цагаан ордонд албан ёсны угтах ёслол, хоёр улсын удирдагчдын уулзалт, төрийн хүндэтгэлийн зоог зохион байгуулагдана.
Ши Жиньпин, Дональд Трамп нарын уулзалтаар АНУ, БНХАУ-ын харилцаа, худалдаа, тариф, ховор металлын нийлүүлэлт, хиймэл оюун ухаан болон дэвшилтэт технологийн асуудлыг хэлэлцэх төлөвтэй байна. Түүнчлэн Тайвань болон олон улсын геополитикийн нөхцөл байдал уулзалтын гол сэдвүүдийн нэг байх төлөвтэй байгаа юм.
Хятадын Гадаад хэргийн яамнаас уг айлчлалын үеэр хоёр улсын төрийн тэргүүн БНХАУ-АНУ-ын харилцааны стратегийн болон урт хугацааны асуудлууд, мөн дэлхийн энх тайван, хөгжлийн талаар санал солилцоно гэж мэдээлжээ. Бээжин хоёр талын яриа хэлэлцээг нэмэгдүүлж, санал зөрөлдөөнөө зохицуулах, хамтын ажиллагааг өргөжүүлэхийг зорьж байгаагаа мэдэгдсэн байна.
Ши Жиньпиний гэргий Пэн Лиюань мөн айлчлалын хүрээнд тусгай хөтөлбөрүүдэд оролцоно. АНУ-ын тэргүүн хатагтай Мелания Трамптай хамт соёлын чиглэлийн арга хэмжээнд оролцохоор төлөвлөсөн бөгөөд хоёр улсын тэргүүн хатагтай нарын хөтөлбөр нь соёл, хүмүүнлэгийн харилцааг онцлох юм.
Айлчлалын төгсгөлд Ши Жиньпинд зориулсан хувийн цайны уулзалт болон Вашингтон дахь АНУ-ын Үндэсний архивтай танилцах хөтөлбөр багтжээ.
Ши Жиньпиний энэ удаагийн айлчлал нь худалдаа, технологи болон геополитикийн асуудлаарх өрсөлдөөн үргэлжилж буй үед АНУ, БНХАУ-ын өндөр түвшний яриа хэлэлцээг үргэлжлүүлэх чухал уулзалт болж байна.
Эх сурвалж: Reuters.com
