, УБ
, УБ
“Mining Week & MinePro 2026” олон улсын чуулган, үзэсгэлэнгийн хүрээнд өнөөдөр (2026.09.16) “KOREA PAVILION”-ны албан ёсны нээлт болон Монгол-Солонгосын хамтын ажиллагааны Санамж бичиг (MoU) байгуулах ёслол амжилттай боллоо.
Арга хэмжээнд БНСУ-аас Монгол Улсад суугаа Элчин сайд Чой Жин Вон, БНСУ-ын Уул уурхайн нөхөн сэргээлт, ашигт малтмалын корпораци (КОМИР)-ийн Захирал Хван Ён Шиг болон Ашигт малтмал, газрын тосны газрын (АМГТГ) дарга П.Баянбаатар нар оролцов.
Нээлтийн үеэр Монгол Улсын АМГТГ болон БНСУ-ын “КОМИР” корпораци хооронд хамтын ажиллагааны Санамж бичигт гарын үсэг зурлаа.
АМГТГ-ын дарга П.Баянбаатар хэлсэн үгэндээ “Өнөөдрийн арга хэмжээ бол манай хоёр байгууллагын хувьд зөвхөн санамж бичиг зурах үйл ажиллагаа бус, хамтын ажиллагааг дараагийн шатанд гаргах шинэ боломжийн эхлэл юм. Монгол Улсын Засгийн газраас салбарын эрх зүйн шинэтгэлийг хийж байгаа энэ үед БНСУ-ын дэвшилтэт технологи, туршлага бидэнд чухал ач холбогдолтой. Цаашид геологийн мэдээлэл, хайгуул судалгаа, хүний нөөцийн чадавхыг бэхжүүлэх болон нөөцийг эдийн засгийн эргэлтэд оруулах чиглэлээр урт хугацааны, харилцан ашигтай түншлэлийг өргөжүүлнэ гэдэгт итгэлтэй байна" хэмээн онцоллоо.
Талууд тус санамж бичгийн хүрээнд ховор металл, чухал ашигт малтмалын судалгаа болон “Монгол-Солонгосын хамтарсан Ховор металлын судалгааны төв байгуулах ODA төсөл”-ийг эрчимжүүлэн хамтран хэрэгжүүлэхээр тохиролцов.
