АШУҮИС болон Япон улсын Токушима их сургууль хамтран хэрэгжүүлж буй SATREPS хөтөлбөрийн хүрээнд Жайка олон улсын байгууллага, Монголын эрүүл мэндийн сэтгүүлчдийн “Цагаан үзэг” холбоо хамтран “Хамгийн чухал нь эрүүл мэнд”-2026 сэтгүүлчдийн үндэсний уулзалт, сургалт, хэлэлцүүлгийг зохион байгууллаа.

Уулзалт, сургалт, хэлэлцүүлгийг АШУҮИС-ийн ректор, АУ-ны доктор Б.Дамдиндорж нээж, оролцогчдод хандан мэндчилгээ дэвшүүлж, хурлын үйл ажиллагаанд амжилт хүслээ. Тэрээр эрүүл мэндийн салбарын шинжлэх ухаан, судалгааны үр дүнг олон нийтэд үнэн зөв, ойлгомжтой хүргэхэд сэтгүүлчдийн үүрэг, оролцоо чухал болохыг онцоллоо.

Япон улсын Токушима их сургуулийн Төгсөлтийн сургуулийн Бичил амь судлалын тэнхимийн вирус судлалын профессор, төслийн Япон талын ерөнхий судлаач Такааки Кома “Вируст гепатит гэж юу вэ? Гепатит Дельта вирус яагаад чухал вэ?”, Токушима их сургуулийн Эмгэг судлал, лабораторийн АУ-ны тэнхимийн профессор Цүнэяма Койчи “Вируст гепатит ба элэгний хорт хавдар: Оношилгоо ба эмгэг жам”, Япон улсын ХӨСҮХ-ийн Эм хөгжүүлэлтийн албаны дарга Ваташи Койчи “Вируст гепатитаас урьдчилан сэргийлэх: Вакцинжуулалт болон эмчилгээний өнөө үеийн боломж”, АШУҮИС-ийн Био-Анагаахын хүрээлэн, сургуулийн захирал АУ-ны доктор, профессор, төслийн Монгол талын ерөнхий судлаач Ч.Баттогтох “Гепатит вирусийн халдварт өртөх эрсдэлт зан үйл” сэдвээр сургалт хийж, хэлэлцүүлэг өрнүүлсэн байна.

Уг арга хэмжээний хүрээнд гепатит вирусийн халдвар дамжих зам, халдварт өртөх эрсдэлт зан үйл, эрсдэлт хүчин зүйлсээс гадна оношилгоо, эмгэг жам, урьдчилан сэргийлэлт, вакцинжуулалт, эмчилгээний орчин үеийн боломжийн талаар шинжлэх ухааны үндэслэлтэй цогц мэдээллийг сэтгүүлчдэд хүргэсэн байна.

Сургалтын төгсгөлд ирэх онд хийхээр төлөвлөж байгаа гепатит дельта вирусийн халдварын тархалтыг тогтоох үндэсний хэмжээний судалгааны талаар танилцуулга хийлээ.

Ивээн тэтгэлэгт мэдээ