, УБ
, УБ
Хятадын Коммунист Намын урилгаар БНХАУ-д ажлын айлчлал хийж буй Ардчилсан намын Дарга, Улсын Их Хурал дахь Ардчилсан намын бүлгийн дарга, УИХ-ын гишүүн О.Цогтгэрэл тэргүүтэй төлөөлөгчид Бээжин хотын Дашин дүүрэг дэх Олон улсын устөрөгчийн эрчим хүчний жишиг бүстэй танилцлаа. Төлөөлөгчдөд устөрөгчөөс эрчим хүч гарган авах технологийг танилцуулсан юм.
Устөрөгчөөс эрчим хүч гаргаж авах технологи нь хурдтай хөгжиж буй бөгөөд БНХАУ нь энэ чиглэлээр дэлхийд тэргүүлж байгаа цөөхөн орны нэг юм байна. Ардчилсан намын зүгээс уул уурхай, эрчим хүчний салбарыг түшиглэсэн эдийн засагтай эх орондоо уг технологийг ашиглах, нэвтрүүлэх, хөгжүүлэх талаар санал солилцлоо
Бээжин хотын Дашингийн Олон улсын устөрөгчийн эрчим хүчний жишиг бүс нь 2020 онд байгуулагдсан бөгөөд устөрөгчийг үйлдвэрлэхээс эхлээд хадгалах, тээвэрлэх, цэнэглэх, эцсийн хэрэглээнд нэвтрүүлэх хүртэлх үйлдвэрлэлийн иж бүрэн сүлжээг бүрдүүлжээ. Өнөөдрийн байдлаар тус бүсэд устөрөгчийн эрчим хүчний судалгаа, туршилт, тоног төхөөрөмжийн үйлдвэрлэл, хэрэглээний чиглэлээр үйл ажиллагаа явуулдаг 200 гаруй байгууллага, аж ахуйн нэгж төвлөрөөд байгаа аж.
