ОХУ-ын Алтайн хязгаарын хөдөө аж ахуйн сайд С.А.Межин тэргүүтэй төлөөлөгчидтэй уулзлаа

ХХААХҮЯ-ны Төрийн нарийн бичгийн дарга Т.Жамбалцэрэн ОХУ-ын Алтайн хязгаарын Хөдөө аж ахуйн сайд С.А.Межин тэргүүтэй төлөөлөгчдийг хүлээн авч уулзлаа. Уулзалтын эхэнд Төрийн нарийн бичгийн дарга Т.Жамбалцэрэн ОХУ-ын Алтайн хязгаарын төлөөлөгчидтэй уулзаж, хөдөө аж ахуйн салбарын хамтын ажиллагааны талаар санал солилцох болсондоо талархалтай байгаагаа илэрхийлэв. Тэрбээр Монгол Улсын Засгийн газар хүнсний баталгаат байдлыг хангах, хөдөө аж ахуйн бүтээмж, чанар, өрсөлдөх чадварыг нэмэгдүүлэх, уур амьсгалын өөрчлөлтөд тэсвэртэй, тогтвортой үйлдвэрлэлийг хөгжүүлэх, түүхий эдийг дотооддоо боловсруулж нэмүү өртөг шингээх, экспортыг нэмэгдүүлэхэд анхаарч ажиллаж байгаа гэдгийг дурдаж, Монгол Улсын Ерөнхийлөгчийн санаачилгаар "Цагаан алт", “Хүнсний хувьсгал”, “Шинэ хоршоо”, “Атар-4” зэрэг Үндэсний хөдөлгөөнийг өрнүүлэн амжилттай хэрэгжиж байгааг онцоллоо. 

Мөн малын эрүүл мэнд, мал эмнэлгийн үйлчилгээ, оношилгоо, био аюулгүй байдлыг олон улсын жишигт хүргэж, хүнсний аюулгүй байдал, экспорт, малчдын орлого, хөдөөгийн тогтвортой хөгжлийг дэмжих стратегийн хөрөнгө оруулалт болгон хөгжүүлэхээр зорьж байгааг тэмдэглэв. Монгол Улс нийт 70 сая толгой малтай бөгөөд үүнээс 20 сая толгой орчим нь эргэлтэд орж байна. Иймээс мах, махан бүтээгдэхүүн экспортлох бүрэн боломжтой. Гэхдээ зөвхөн түүхий эд экспортлохоос илүүтэйгээр нэмүү өртөг шингээсэн бүтээгдэхүүн үйлдвэрлэх чиглэл баримталж байгааг Төрийн нарийн бичгийн дарга Т.Жамбалцэрэн хэлсэн үгэндээ дурдлаа.  

ОХУ-ын Алтайн хязгаарын Хөдөө аж ахуйн сайд Сергей Анатольевич Межин хөдөө аж ахуйн салбар дахь хамтын ажиллагаагаа өргөжүүлэх талаар тодорхой саналууд хэлэв. Тухайлбал, ОХУ-ын Алтайн хязгаараас Монгол Улсад үр тариа, улаанбуудай, гурил, гурилан бүтээгдэхүүн, ургамлын тос, малын тэжээл нийлүүлэх сонирхлоо илэрхийлэв. Мөн Монгол орны хуурай, сэрүүн уур амьсгалд зохицон үр тарианы сорт гарган авах, Алтайн хязгаарт мал эмнэлэг, үр тариа зэрэг хөдөө аж ахуйн чиглэлээр оюутан сургах, боловсон хүчин бэлтгэхэд хамтран ажиллах боломжтой гэлээ. 

Талууд хүнс, хөдөө аж ахуйн салбарт хамтын ажиллагааг өргөжүүлэх чиглэл, боломжуудын талаар санал солилцож, өмнө нь байгуулсан санамж бичгийн хүрээнд хамтын ажиллагааны замын зураг, төлөвлөгөөг гаргахаар боллоо.