, УБ
, УБ
“Mining Week & MinePro 2026” олон улсын уул уурхайн үзэсгэлэн, чуулганы хүрээнд “Уул уурхай ба ногоон эрчим хүч – Монголын байр суурь” сэдэвт Элчин сайд нарын хэлэлцүүлэг өнөөдөр боллоо.
Хэлэлцүүлэгт АҮЭБЯ-ны Төрийн нарийн бичгийн дарга Б.Дашпүрэв, Монгол Улс дахь гадаад улсын Элчин сайд, дипломат төлөөлөгчид болон салбарын төлөөлөл оролцож, уул уурхайн салбарын эрчим хүчний хэрэглээ, ногоон шилжилт, цаашдын бодлогын чиглэлийн талаар санал солилцов.
Б.Дашпүрэв хэлэлцүүлгийн үеэр Монгол Улсын уул уурхайн салбарын цахилгаан эрчим хүчний хэрэглээний өнөөгийн нөхцөл, цаашдын өсөлтийн төлөвийг танилцууллаа. 2025 онд Монгол Улсын цахилгаан эрчим хүчний нийт хэрэглээ 12.6 тэрбум кВт.ц хүрсэн бөгөөд уул уурхайн томоохон хэрэглэгчид 3.66 тэрбум кВт.ц буюу нийт хэрэглээний ойролцоогоор 29 хувийг хэрэглэсэн талаар мэдээлэв.
Тэрбээр уул уурхайн салбарын ногоон шилжилтийг зөвхөн цахилгаан эрчим хүчний хэрэглээг нэмэгдүүлэхээр хязгаарлахгүй, дизель түлшний хэрэглээг бууруулах, үйлдвэрлэл болон тээврийг цахилгаанжуулах, сэргээгдэх эрчим хүч, батарей хуримтлуурын технологийг үе шаттай нэвтрүүлэх шаардлагатайг онцоллоо.
Мөн Засгийн газрын бодлого нь уул уурхайн өсөн нэмэгдэж буй түлш, эрчим хүчний хэрэгцээг найдвартай хангахын зэрэгцээ импортын хамаарлыг бууруулж, дотоодын сэргээгдэх эрчим хүч болон шинэ технологид тулгуурласан тогтолцоонд шилжихэд чиглэж байгааг танилцуулав.
Хэлэлцүүлгийн үеэр уул уурхай, эрчим хүч, тээвэр, байгаль орчны бодлогын уялдааг хангах, уул уурхайн компаниудын өөрийн хэрэгцээнд сэргээгдэх эрчим хүчний эх үүсвэр байгуулах боломжийг нэмэгдүүлэх, цахилгаан тээвэр болон хуримтлуурын технологийг хөгжүүлэх асуудлыг мөн хөндлөө.
Түүнчлэн өмнөх бодлогын хэрэгжилтээс авах сургамж, эрчим хүчний дэд бүтцийн хөрөнгө оруулалт, эрчим хүчний аюулгүй байдал болон уул уурхайн салбарын нүүрстөрөгч багатай технологийн шилжилтийн талаар олон улсын төлөөлөгчид санал бодлоо солилцсон юм.
