Яармагаас Хархорин чиглэлд хэрэгжиж буй дүүжин замын тээврийн төслийн явц 85 хувьд хүрчээ.

Одоогоор хоёр буудлын барилгын дотоод засал, цахилгаан болон системийн тохируулгын ажил үргэлжилж байна. Кабелийн замын тулгуур цамхаг, станц, гарааш болон механик угсралтын үндсэн ажлууд дууссан бөгөөд Францаас нийлүүлсэн нийт 98 кабиныг угсарч, гараашид байршуулжээ.

Пома группийн Монгол дахь төслийн менежер Алексис Гресселийн мэдээлснээр төслийг үндсэн цахилгаан сүлжээнд холбосны дараа системийн туршилтыг эхлүүлэх юм. Цахилгааны холболтыг ойрын 1-2 долоо хоногт хийхээр төлөвлөжээ.

Ес, аравдугаар сард системийн аюулгүй байдлын үе шаттай шалгалт, туршилтыг хийх бөгөөд энэ хугацаанд зорчигч тээвэрлэхгүй. Туршилтаар кабин бүрийн даацтай дүйцэх 750 кг жинг ус болон шуудайтай элсээр орлуулан системийн ажиллагааг шалгана.

Яармагийн Арцатаас Хархорины Өнөр хороолол хүртэлх дүүжин зам 4.2 км урт, хоёр зогсоолтой. Оргил цагт цагт 2,320 зорчигч тээвэрлэх хүчин чадалтай бөгөөд 22 км/цагийн хурдтайгаар 11 минутын дотор зорчих тооцоотой байна.