2026 оны 9 дүгээр сарын 18-ны өдрийн байдлаар улсын хэмжээнд зорилтот бүлгийн 245,108 хүн улирлын томуугийн эсрэг вакцинд хамрагдаж, вакцинжуулалтын хамралт 49 хувьд хүрээд байна.

Нийслэлийн хэмжээнд томуугийн эсрэг вакцинжуулалтын хамралт 53.8 хувьтай байгаа бол орон нутагт 42.3 хувьтай байна.

Нийслэлийн дүүргүүдээс Сонгинохайрхан дүүрэг 67.0 хувь, Хан-Уул дүүрэг 62.5 хувь, Багахангай дүүрэг 57.6 хувийн хамралттай байгаа бол орон нутгаас Сэлэнгэ аймаг 58.6 хувь, Дорноговь 58.3 хувь, Архангай 56.9 хувь, Ховд 54.4 хувь, Орхон 52.4 хувийн хамралтад хүрээд байна.

Томуугийн улирал эхлэхээс өмнө зорилтот бүлгийн иргэдийг вакцинжуулалтад хамруулах ажлыг улсын хэмжээнд зохион байгуулж байна. Тэр дундаа бага насны хүүхдийн вакцинжуулалтын хамралтыг нэмэгдүүлэхэд онцгой анхаарч байгаа юм.

Нийслэлийн хэмжээнд 6 сар–1 насны хүүхдийн томуугийн вакцинжуулалтын хамралт 22.4 хувь, 1–2 насных 21.9 хувь, 3-6 насных 61.3 хувьтай байна. Иймд томуугийн вирусийн идэвхжил нэмэгдэхээс өмнө хүүхдээ болон гэр бүлийн гишүүдээ улирлын томуугийн эсрэг вакцинд хамруулж, халдвараас урьдчилан сэргийлэхийг эрүүл мэндийн байгууллагаас зөвлөж байна.

Иргэдээ дархлаажуулалтад идэвхтэй хамруулж, томуугийн улирлыг угтан ажиллаж буй аймаг, дүүргийн эрүүл мэндийн байгууллага, эмч, эмнэлгийн мэргэжилтэн, эцэг эх, асран хамгаалагчид болон иргэдийн оролцоо чухал байна.