Нийслэлийн ерөнхий боловсролын сургуулиудын ачааллыг бууруулах зорилгоор 2026–2027 оны хичээлийн жилд таван дүүрэгт нийт 21 “гэрт ойр, хотхоны бага сургууль” байгуулжээ. Эдгээр сургуульд 1–5 дугаар ангийн 243 бүлгийн 8,637 хүүхэд хамрагдан суралцаж байна.

Улаанбаатар хотод 2025–2026 оны хичээлийн жилд 412,394 суралцагч ерөнхий боловсролын сургуульд суралцаж байгаа нь 2021–2022 оны хичээлийн жилээс 72 мянга гаруй хүүхдээр өссөн үзүүлэлт юм. Үүний улмаас нийслэлийн төрийн өмчийн сургуулиудын 67 хувь нь 36-аас дээш хүүхэдтэй бүлэгтэй болж, 1,089 бүлэгт 46-аас дээш сурагч хичээллэж байна.

Сургуулийн ачааллыг бууруулах хүрээнд Монгол Улсын Засгийн газрын 2026 оны долдугаар сарын 8-ны өдрийн 300 дугаар тогтоолын дагуу ачаалал багатай төрийн өмчийн цэцэрлэгийн барилгыг ашиглах, сургалтын зориулалттай хувийн хэвшлийн барилга байгууламжийг түрээслэх арга хэмжээг хэрэгжүүлжээ.

Ингэснээр төрийн өмчийн цэцэрлэгийн таван байр болон иргэн, аж ахуйн нэгжийн өмчлөлийн 16 байрыг ашиглан нийт 21 бага сургуулийг ажиллуулж эхэлсэн байна.

Энэ арга хэмжээний үр дүнд гурван ээлжээр хичээллэх эрсдэлтэй байсан 18 сургуулийн 7,587 суралцагч гэрт ойр, хотхоны бага сургуульд хамрагдаж, тухайн сургуулиуд хоёр ээлжээр хичээллэх боломж бүрджээ.

Мөн эдгээр сургуулийн үндсэн бүлэг дүүргэлтийн дундаж өмнөх хичээлийн жилд 44.34 байсан бол 40.26 болж буурсан байна. Харин шинээр ажиллаж буй 21 “гэрт ойр” сургуулийн бүлэг дүүргэлтийн дундаж 36 хүүхэд байгаа аж.

“Гэрт ойр сургууль” арга хэмжээ нь бага ангийн сурагчдыг оршин суугаа газарт нь ойр сургах, хүүхдийн өдөр тутмын зорчих хугацаа болон замын хөдөлгөөний эрсдэлийг бууруулахын зэрэгцээ төвлөрсөн том сургуулиудын ачаалал, оргил цагийн түгжрэлийг бууруулах зорилготой юм.