Олон улсын олимпиадад амжилттай оролцсон сурагчид болон Олимпиадын зохион байгуулах хороодод Ерөнхийлөгчийн нэрэмжит шагнал гардууллаа

Олон улсын олимпиадад амжилттай оролцсон сурагчид болон Олимпиадын зохион байгуулах хороодод Ерөнхийлөгчийн нэрэмжит шагнал гардууллаа.

2026 онд зохион байгуулагдсан олон улсын математик, физик, хими, биологи, газар зүй, мэдээлэл зүй, хиймэл оюун, техник, технологийн 11 олимпиадад Монгол Улсаа төлөөлөн оролцсон сурагчид нийт 36 медаль хүртэж, тусгай байр эзэлсэн амжилт үзүүлсэн.

Олон улсын олимпиадад авьяас билиг, мэдлэг боловсрол, ур чадвараараа өрсөлдөн өндөр амжилт гаргаж, эх орноо дэлхий дахинаа сурталчлан таниулсан сурагчид болон тэднийг бэлтгэсэн Олимпиадын зохион байгуулах хороодод Монгол Улсын Ерөнхийлөгч Ухнаагийн Хүрэлсүх нэрэмжит шагналыг гардуулж, баяр хүргэлээ.

Монгол Улсын Ерөнхийлөгч 2021 онд монгол хүний оюун ухааны үнэлэмжийг дээшлүүлэх, олон улсын түвшинд шинжлэх ухааны мэдлэгээр өрсөлдөх чадварыг дэмжих, олон улсын олимпиадад сурагчдыг оролцох нөхцөлийг бүрдүүлэх, урамшуулах чиглэлээр Засгийн газарт чиглэл өгөх тухай зарлиг гаргасан.

Олон улсын олимпиадаас медаль хүртсэн сурагчид дэлхийн тэргүүлэх их, дээд сургуульд элсэх эрх авснаар “Ерөнхийлөгчийн илгээлт – 2100” тэтгэлэгт хөтөлбөрт хамрагдан суралцах юм.