, УБ
, УБ
Гаалийн ерөнхий газраас гаргасан импортын статистик мэдээллээс авч үзвэл 2026 оны эхний найман сарын байдлаар Монгол Улс нийт 8.37 тэрбум ам.долларын импорт хийсэн байна. Импортын бүтцээс харахад нефтийн бүтээгдэхүүн хамгийн өндөр жин эзэлж, автомашины импорт буурсан бол шатахуун болон хүнсний зарим нэр төрлийн импорт өсжээ.
Нийт импортын 22.1 хувийг нефтийн бүтээгдэхүүн бүрдүүлж, мөнгөн дүнгээр 1.85 тэрбум ам.долларт хүрсэн байна. Өөрөөр хэлбэл импортод зарцуулсан таван ам.доллар тутмын нэг орчим нь нефтийн бүтээгдэхүүнд ногдож байна.
Шатахууны импортын биет хэмжээ өсч автобензиний импорт 619.4 мянган тонн болсон нь 2025 оны мөн үеэс 12.1 хувиар нэмэгдсэн байна. Дизель түлшний импорт 1.26 сая тонн болж, өмнөх оны мөн үеэс 5.8 хувиар өсжээ.
Харин автомашины импорт буурсан үзүүлэлттэй байна. Эхний найман сард 60,350 суудлын автомашин импортолсон нь өмнөх оны мөн үеэс 18 хувиар буурсан үзүүлэлт юм. Ачааны автомашины импорт 13,994 ширхэг болж, 2025 оны мөн үеэс 11.8 хувиар багасжээ. Гэхдээ мөнгөн дүнгээр суудлын автомашин нийт импортын 8.5% буюу 711.9 сая ам.доллар эзэлсээр байгаа нь хэмжээ буурсан ч импортын томоохон ангилал хэвээр байгааг харуулж байна.
Хүнсний бүтээгдэхүүний импортод харилцан адилгүй өөрчлөлт ажиглагдав. Тухайлбал, жимс, самрын импорт 38.2 хувь, тахиа, гахайн мах болон өөхний импорт 29.4 хувь, элсэн чихрийн импорт 17.8 хувь, улаанбуудайн импорт 13.8 хувиар тус тус өсжээ.
Харин цагаан будааны импорт 34.6 хувь, өндөгний импорт 14.3 хувь, ургамлын тосны импорт 6.3 хувиар буурсан байна.
Ингэснээр 2026 оны эхний найман сарын импортын бүтцэд шатахуун өндөр жинтэй хэвээр, автомашины импорт саарч, хүнсний зарим нэр төрлийн импорт нэмэгдсэн дүр зураг ажиглагдаж байна.
Сэтгүүлч: Т.Нар
