Цэргийн дүйцүүлэх албаны журмыг шинэчилж орон нутгийн хүний нөөцийн хангалтыг сайжруулахад хамтарч ажиллана

Өнөөдөр Ховд аймагт “Эх оронч Монгол” сургалт, өдөрлөг үргэлжилж байна.

Сургалт, өдөрлөгийн үеэр Батлан хамгаалах салбарт хэрэгжүүлж буй бодлого, шинэчлэл, орон нутгийн хүний нөөцийн асуудлыг шийдвэрлэхэд чиглэсэн шинэ зохицуулалтуудын талаар иргэд, алба хаагчдад танилцууллаа.

Тэр дундаа цэргийн үүргийг улс орны хөгжлийн бодлоготой уялдуулах, алслагдсан бүс, орон нутагт дутагдалтай байгаа мэргэжлийн хүний нөөцийг нөхөхөд бодит дэмжлэг үзүүлэх зорилгоор цэргийн дүйцүүлэх албаны журмыг шинэчлэх ажлыг эхлүүлээд байна.

Энэ хүрээнд Цэргийн албаны тухай хуулийн шинэчилсэн зохицуулалтаар алслагдсан бүс, орон нутагт нэн шаардлагатай эмч, багш болон бусад эрэлттэй мэргэжлээр гурван жил ажилласан иргэнийг цэргийн дүйцүүлэх алба хаасанд тооцох боломжийг бүрдүүлэхээр ажиллаж байна.

Ингэснээр орон нутагт дутагдалтай байгаа эмч, багш, бусад мэргэжилтнийг тогтвор суурьшилтай ажиллуулах, залуусыг орон нутагт ажиллах сонирхлыг нэмэгдүүлэх, төрийн үйлчилгээний хүртээмжийг сайжруулахад чиглэсэн бодит хөшүүрэг болох юм.

Өнөөдрийн байдлаар Ховд аймагт нийгэмд эрэлттэй мэргэжлийн 78 алба хаагчийн дутагдал байгаа нь хүний нөөцийн асуудлыг батлан хамгаалах бодлого, орон нутгийн хөгжлийн бодлоготой уялдуулан шийдвэрлэх шаардлага байгааг харуулж байна.

Мөн орон нутгийн онцлог, хэрэгцээнд нийцүүлэн “Малчин цэрэг” хөтөлбөрийг сэргээхээр тусгаж, цэргийн албаны шинэ тогтолцоог зөвхөн улсын батлан хамгаалах хэрэгцээг хангахаас гадна, алслагдсан бүс нутгийн хүний нөөц, нийгэм, эдийн засгийн хөгжилд бодит хувь нэмэр оруулах чиглэлээр хэрэгжүүлэхээр зорьж байна.

“Эх оронч Монгол” сургалт, өдөрлөгийн хүрээнд Батлан хамгаалах салбарын бодлого, үйл ажиллагааг иргэд, олон нийтэд танилцуулах уулзалт, Цэргийн төв эмнэлгийн хөдөлгөөнт багийн үзлэг, оношилгоо, Батлан хамгаалахын төв архивын лавлагаа үйлчилгээ, зэвсэглэл, техникийн үзэсгэлэн,Цэргийн Дуу Бүжгийн Эрдмийн чуулгын тоглолт зэрэг олон талт арга хэмжээ зохион байгуулагдаж байна.

Үйл ажиллагаанд Ховд аймгийн Иргэдийн Төлөөлөгчдийн Хурлын дарга З.Эрхбаяр, аймгийн Засаг дарга М.Амарсанаа тэргүүтэй орон нутгийн удирдлагууд, Батлан хамгаалах яам, Зэвсэгт хүчний Жанжин штаб болон салбарын харьяа байгууллагуудын удирдлага, алба хаагчид, орон нутаг дахь төрийн цэргийн болон хууль сахиулах байгууллагын удирдлага, алба хаагчид, Ховд аймгийн иргэд оролцож байна.